Akileraartartut 22.700-ut ukiumut akileraarfiusumut 2017-imut akileraarpallaarsimasut Akileraartarnermut Aqutsisoqarfimmiit utertuussapput, Akileraartarnermut Aqutsisoqarfik tusagassiuutinut nalunaarummi paasissutissiivoq.

Akiitsunik ilanngaassineq

Utertoorutissat 166,6 millioner koruuniupput taamaattoq 45,7 millioner koruuunit akileraartartut ilaannit ilanngaatigineqassapput, taakku pisortanut akiitsui matusissutigalugit akiliutaassapput. Taamaalillutik kommunit, INI, Iserit aamma Nukissiorfiit 23,6 millioner koruuninik tigusissapput sinneruttullu 22 millioner koruunit Namminersorlutik Oqartussanit tiguneqassallutik.

Akileraartartut 10.292-it utertuussanngillat taamaattoq 150,4 millioner koruuninik akiliuteqassapput taakkunannga 52,9 mio. koruunit 2019-imut siumoortumik nalunaarsuinermut atatillugu ilanngunneqassapput.

Akilersuineq

Akileraartarnermut Aqutsisoqarfiup paasissutissiaraa, akileraarutissat sinnerinut akiligassat siumoortumik nalunaarsuinermut ilanngunneqarsimanngitsut ulluni 01/09, 01/10 aamma 01/11-2018-imi akiligassanngortinneqassasut. Qaammatit ulluisa 20-anni kingusinnerpaamik akiliisoqartassaaq.