Aajuna RAL-ip aningaasaqarnermut pisortartaava
Umiarsuaatileqatigiiffiup aningaasaqarnermut pisortaa nutaaq Dubaimit Nuummut nuussaaq
Royal Arctic Linep 37-nik ukiulik Peter Christoffersen pisortap tulliatut, CFO, decembarip aallaqqaataani atuutilersumik atorfinitsippaa.
Peter Christoffersen Dubaimit Nuummut nuussaaq, taanna Indiami, Kangia qiterlermi Afrikamilu niuernikkut ingerlatsinikkullu automatiseerinermik suliniuteqarnermut akisussaasutut suliffeqarfimmi Mærskip pigisaani Damcomi atorfimmeersuuvoq.
Umiarsuaatileqatigiiffik tusagassiuutinut nalunaarummi taama allappoq.
Kalaallit Nunaannit, Kalaallit Nunaannut nunallu iluani assartuussinermut aaqqissuussinerup siunissamut isumannaarnissaanik Royal Arctic Linemi suliassaqarpugut annertuumik pissanganartumillu. Tamanna allannguutinik annertuunik aammalu aningaasartuutitta tatineqarnerinik pilersitsivoq. Peter assartuussinermut ingerlasussanillu piareersaanermut aqutsinermullu tunngatillugu, aqutsinermut sakkussatigut ingerlatseriaatsinillu pitsanngorsaanissamut piumasaqaateqarfiusunik annertuumik misilittagaqarpoq. Peter pisortaqatigiinnut peqataalernera aaqqissuussaaneq akimorlugu qanoq iliornissamut nukissaqarnerulernitsinnik annertuumik kinguneqassaaq, pisortaaneq Verner Hammeken taama oqarpoq.