Nuna tamakkerlugu isumaqatigiissutaasumik aalisarnermut inatsit qanoq suliarineqarsinnaanera Sulisitsisunit aggustimi saqqummiunneqarpoq. Inuusuttut aalisartut salliutillugit saqqummiussisoqarpoq. Aningaasaqarnerup tungaatigut qanoq pitsaanerpaamik angusaqartoqarsinnaanersoq aamma ilanngunneqarpoq.

Pilersaarut

Suliniut Naalakkersuisunut nassiunneqarsimasoq Sermitsiaq.AG-mit pissarsiarineqarpoq. 

- Erik Jensenip aalisarnermut inatsisissatut siunnersuutaareersimasoq allanngortinnagu siunnersuutiginiarlugu ataatsimiinnitsinni ilisimatitsivoq. Taamaattumik suliarput naleqarunnaarpoq, Sulisitsisuni pisortaq Brian Buus Pedersen oqarpoq.

Naalakkersuisunit aamma Erik Jensenimit neriuutigineqarpoq siunnersuut Inatsisartut ukiaanerani ataatsimiinneranni saqqummiunneqassasoq. Pisulli kingulliit takutippaat qularnarsinnaasoq, tassami siunnersuut Inatsisartuni Siulittaasoqarfimmit akuerineqaqqaartussaavoq.

Neriulersitsineq

Tamanna Sulisitsisunut neriulersitsivoq, neriuutigineqarpormi Naalakkersuisut suleriusissatut siunnersuut qimerloorneqassasoq. KNAPK-miimmi aamma neriuutigineqarpoq aalisarnermut inatsisissaq kinguartinneqassasoq, suliarilluarneqarnissaa tassani neriuutigineqarluni.

Suleqatigiissitamik pilersitsisoqarnissaa Sulisitsisunit neriuutigineqarpoq. Suleqatigiissitami Namminersorlutik Oqartussanit, aalisarnermut inuussutissarsiuteqartunit, aningaasaqarnermut ingerlatsisunit kiisalu aalisarnerup iluani pingaarutilimmik inissisimasunit ilaasortaqarnissaa siunnersuutiginerpoq.

Suleriusissiaq suleqatigiissitamut saqqummiussiffigineqassasoq siunnersuutigineqarpoq, tassanngaanniillu nalunaarusiamik, 2019-mi juunip aallaqqaataani naammissineqarsimasussamik, sanasoqarnissaa siunnersuutaalluni, Sulisitsisut ilisimatitsipput.

Piujuaannartitsinissamik, ilisimatuussutsikkut, aningaasarsiornikkut, nunap aningaasaqarneranut kiisalu ingerlanneranut tunngasunik imaqartussatut siunnersuutigineqarpoq. Tassami qitiusumik sammineqassapput:

Suliniutip nassuiaataa
Piginneqataassutsimut tunngasut aalisarnermullu aningaasaliissutit
Aalisarnermut suliarinninnermullu aaqqiissutaasunik sinaakkusersuineq

Suleqatigiissitap pilersitaanik Naalakkersuisut qanoq suliaqarsinnaanerat ima nassuiarneqarpoq:

• Aalisarnerup tungaatigut suliffeqarfinnik sulisunillu inerisaaneq
• Aalisarnerup aningaasarsiorluarfigineqarnissaa anguniarlugu periarfissanik ujaasinerit. Ussassaarinerit pitsaanerulernissaat, kiisalu aalisagaqassuseq naapertorlugu aningaasaqarnikkut atorluaaneq. Aalisarnerup inuiaqatigiinnut pitsaanerusumik sunniuteqaqataanissaa
• Aningaasarsiorfiunngitsut nunap aningaasaqarneranut tuttassanngitsoq, taamaattoq ineriartornissaq anguniarlugu ingerlatsinikkut siuarsaanerit, aaqqissuussinikkut inerisaanerit kiisalu kinguaariit tulliisa ingerlatitseqqinnissaannut suliniuteqarnerit

Siunnersuutip ingerlalluarnissaa anguniarlugu allattoqarfimmut aningaasartuutinut tapiisoqarnissaa kissaatigineqarpoq. Tamanna Naalakkersuisunit aningaasaliiffigineqassaaq. Suleqatigiissitami siulittaasoq aamma avataaneersumik suleqataasoq akissarsiaqartinneqassapput. Suleqatigiissitami suleqataasut ilaasortallu aningaasarsisassannginnissaat siunnersuutaavoq.