Filmiliortartut akornanni iluatsitsinerup aappassaaneernissaa ajornakusoorsinnaasoq oqaatigineqarsinnaasarpoq. Kisianni Nuuk International Film Festivalimik aaqqissuisut tassunga tunngatillugu nangaassuteqanngilaq.

- Nuuk International Film Festivalip aappassaa ullumi aallartippat Kalaallit Nunaanni filmiliornermik eqqumiitsuliorneq nalliuttorsiornerussaaq. Maluginiartariaqarpoq filmiliorluni eqqumiitsulioriaaseq ukiulluunniit qulit matua siorna takussaanngilaq, taamak oqarpoq Pipaluk K. Jørgensen, Film.gl-ip siulittaasua, taanna aamma festivalimik aaqqissueqataavoq, ulluni sisamani illoqarfiit pingaarnersaanni pisoqarfiungaatsiartussami, tassami filminik takutitserngaartoqassaaq, oqallittoqartassaaq, akissarsisoqassaaq, natersuaqassaarlu aappaluttumik.

Ammaanersiorneq pisortatigoortoq Katuami Hans Lyngep inersuani unnugu ingerlanneqartussami, nalliuttorsiorpalaartumik aallarniissaaq oqalugiarluni Arctic Indigenous Film Fundip siulittaasortaava Kuupik V. Kleist, kiisalu eqqumiitsuliullammak Varna takutitsillatsiassaaq. ​​​​​​​Kinguneralaanngualu filminik naatsulianik isiginnaartoqassaaq, filmiliaq nutaarluinnaq, Samit nunaanneersoq, tullialu isiginnaartitassaq nunatsinni takuteqqaarneqartussaq filmiliaq Ága, Siberiami Inuit nunaanni pisimasuuvoq, produceri Sardana Savvina, Sakha Republicimeersoq aallarniiumaarpoq.

Ilisimatusarfiup akeqanngitsumik sisamanngorpat takutissavaa "The People of the Kattawapiskak River". Taassuminnga filmiliortuuvoq 86-nik ukiulik Alanis Obomsavin aamma najuuttusaavoq. Takutinneqartoq naappat professori Jette Rygaard Alanis Obomsavin eqqartueqatigissavaa, taakku ilaatigut eqqartussavaat Alanis Obomsavinip filmiliai 50-nik ikinnerunngitsut. Alanisip filmiliaa kingulleq "Our People Will Be Healed" Katuami unnukkut.

Tallimanngorpat ualikkut Katuami inersuaaqqami oqallittoqassaaq. Issittumi filmiliornermik ingerlataqartut oqallissutigissavaat siunissami qanoq filmiliortarneq isikkoqaratarsinnaasoq. Issittumi filmiliortarneq maannakutulli ingerlaannassava? Ingerlariaqqinnerlu qanoq isikkoqassava? Naapikkit Samit filminstituttianni pisortaq Anne Lajla Utsi, Nunavumi filminstituttip pisortaa Huw Eirug aamma Kuupik Kleist kiisalu Sardana Savvina.

Tallimanngorpat meeqqanut ualikkut takutitsisoqassaaq kingusinnerusukkullu pissanganartuliaq Bonfire, taanna 2016-mi pingaarnertut imagineNATIVE Film + Media Arts Festivalimi akissarsivoq.

Arfininngorpat festivalip ullut kingullersaanni Katuami meeqqanut takutitsisoqassaaq kiisalu TV-kut toqqaannartoq oqallinneq aningaaserivimmi GrønlandsBankep nerisarfiani ingerlanneqassaaq. Ulloq naggaserlugu naggataarnersiorneq Canadamiut naatsuliaat “Three thousand” isiginnaarneqarsinnaavoq aamma takuteqqaarneqartussaq Kalaallit filmiliaat pissanganartuliaq “Anori”, tassani inuttaavoq pingaarnertut Nukâka Coster- Waldau.

Festivali naammassillugu arfininngorpat unnukkut Kalaallit filmiliornermik akissarsisitsissapput, taanna taaguuteqarpoq Innersuaq.