Aavariaq politiinit ujaarineqarpoq
Angut qulimiguulimmik S-61-mik Nuup Kangerluani ujaarineqarpoq
Nuummi politiit angut aavariaq Nuup Kangerluani ilorpasissumi, Majualami, arfininngornermi tammartoq ujaarineqartoq pillugu KNR ataasinngornerup ullaani allappoq.
Nuummi politiit qulimiguulik S-61 atorlugu Nuup Kangerluani angut ujaaraat.
Aasiaat Radioata angut ujarneqartoq vhf radiokkut kingullermik ataasinngornerup unnuaani attaveqaqatigisimavaat, angutilli vhf radiomi batterii sipaarniaramigit suli attavigineqaqqissimanngilaq.
Ujaarineqartup nassuiarneqarnera:
- Angut kalaaleq qernertumik kasketilik
- 50-it naajartorneranni ukiulik
- Qernertumik kavaajaqartoq meqquluanik imalimmik, aappaluartumik ilupaqutilik
Majualami aavartut allat politiit angummik ujaasinerannut ikiortaasinnaasumik takusaqassagaluarpata takusaqarsimappataluunniit oqarasuaammut 701448-mut attaveqaqqusipput.
