Air Greenland: Sandwichit sipaarniutaanngillat
Air Greenlandip Danmarkimut angalasuisa kissartutoratik sandwichimik Müsli-barimik iipilimillu ataatsimik minnerpaamik qaammatip naanissaata tugaanut sassaalleerfigineqartarallassapput
Timmisartup Airbusip iluarsartuunneqarneranut atatillugu ingerlatseqatigiiffik nutaamik nerisassanik sassaallertarnermik aaqqissuussivoq, tassani nerisassat kissartut ilaatigut sandwichinik taarserneqarlutik.
- Qularutissaanngilaq, Facebookimi quppernitsinni arlaleriarluta isornartorsiorneqarsimanerput. Maajip ulluisa aallaqqaataani nerisassanik sassaalleeriaaserisimasarput uterfigissanerlugu aalajangiiffigissavarput, Katrine Nathanielsen Air Greenlandimi attaveqaqatigiinnermut pisortaasoq, paasissutissiivoq.
Naak timmisartuutileqatigiiffimmi atuisut qisuariaataannik katersuisoqarsimangaluartoq, misileraaneq ingerlanneqaannassaaq.
- Qularutissaanngilaq, sandwichinik taarsiisimaneq atuisut tugaanniit kiffartuussinerup appariaateqarneranik
nalilerneqarnera. Oqaatigisariaqarparalu nutaamik nerisassanik sassaalleeriaaseq amerlasuunit sipaarniutitut isigineqaraluartoq, sipaarniutaanngimmat, attaveqaqatigiinnermut pisortaq paasissutissiivoq.
- Misissuititsinitta takutippagu ilaasut nerisassat sassaalliutigisarsimasatta utertinneqarnissaannik kissaateqartut, taava utertinneqarnissaat ajorinngilarput, Katrine Nathanielsen paasissutissiivoq, periutsillu ingerlanneqarnerani ingerlatseqatigiiffiup ilinniarfigisimagaa ilanngullugu oqaatigaa.