Ajunngisaarneq: Roskildemi peqatigiiffiup Nanortalimmi lejrskole qalipakkaa
Nanortallip atuarfiata aallaarsimaartarfia Roskildep Nanortallillu ikinngutigiittut peqatigiiffianit tunissutisivoq, peqatigiiffiup ilaasortaasa lejrskole qalipappaat.
Venskabsforeningen Roskilde – Nanortalimmi ilaasortat 24-t sapaatip-akunnerini marlunni Kujataani Nanortalimmut angalareerlutik angerlaqqammerput. Peqatigiiffik taama ilisimatitsivoq.
- Nanortallip atuarfiata aallaarsimaartarfia Tarsermiuniittoq ukiunik arfineq-pingasunik pisoqaassuseqartoq, tikeraarnerminni sapaatip-akunnera qalipaanermut atorpaat, siulittaasoq Alf Tornberg allappoq.
Qalipattariaqartoq
Ukiut marluk matuma siorna Nanortallip Katersugaasiviani qallunaatsiaat ulloqartinneqarnerannut atatillugu peqatigiiffiup aallaarsimaartarfik atorpaat, tassanilu peqataasut ilaasa qalipattariaqalersimasoq maluginiarpaat.
Kingorna ilaasortat ataatsimiinneranni aallaarsimaartarfiup silataata qalipanneqarnissaa siunertaralugu angalasoqarnissaa aalajangiunneqarpoq.
- Qaqqanik kusanartunik avatangiiseqarluni aamma silagissiorluni qalipaasoqarpoq, qernertumik, aappaluttumik aamma qaqortumik, maannalu qalipaqqammerluni kusatsippoq. Tassanilu aamma illu eqqiarneqarpoq.
Pinngortitaq ilorrisimaarfigaat
Angalanermut peqataasut aamma pinngortitaq kusanartoq ilorrisimaarfiginissaanut piffissaqarput, aamma savaatilimmut pulaarput. Aqutsisoqarfimmi pisortaq Jens Korneliussen aamma atuarfiup pisortaa Karl Frederik Danielsen aqqusaarput, suliniullu nuannaarutiginerarpaat.
Angalaqatigiit sulilluareerlutik Narsarsuarmut ingerlaqqipput, tassani sumiiffiit oqaluttuarisaanermut attuumassutillit tikippaat, taakku maanna allanngutsaaliukkamut UNESCO-p kulturikkut kingornussassatut allattorsimaffianut ilanngunnikuupput.
Pitsaasumik qisuariartoqartoq
- Ikinngutigiit peqatigiiffiata oqaasinnaavata ‘’Vi løfter i flok’’ (ataatsimut kivitseqatigiittarpugut) nukittussusia uppernarseqqinneqarpoq, tikeraarnermilu pitsaasumik qisuariarnerpassuit pissarsiarineqarput, peqatigiiffik nalunaaruteqarpoq.
Farvehuset aamma Dyreklinikken Viking qalipaatinut aningaasaliisuupput, aningaasallu Musik i Gårdenip siorna aaqqissuunneqarneranit iluanaarutineerput.