Akit takukkit: Ikummatissap akia annertuumik apparneqartoq
Ikummatissap akia aqagu appariangaatsiassaaq, innuttaasullu aningaasanik sipaarutissaqarput. Ataatsimut isigalugu kalaallinut atuisunut 58 millionit koruunit sipaarutaassapput.
Polaroilip akit nutaat marsip 10-anni atuutilertussat saqqummiuteqqammerpai, biiliutillillu aqagu orsernissaminnut utaqqinissaat qularnarunanngilaq.
Akit
- Gasolie/diesel: literimut 5,55 kr-imiit 5,10 kr.-imut appartinneqarpoq avatangiisinut akitsuut literimut 10 øre-usoq ilanngullugu.
- Petroleum: literimut 5,66 kr.-imiit 5,21 kr.-imut appartinneqarpoq avatangiisinut akitsuut literimut 10 øre-usoq ilanngullugu.
- Benzin: literimut 5,40 kr.-imiit 4,95 kr.-imut appartinneqarpoq avatangiisinut akitsuut literimut 10 øre-usoq ilanngullugu.
– Ikummatissat akiata appartinneqarnerata matuma malitsigissavaa atuisartut ikummatissamut ukiumut 58 mio. kr.-it missaanni aningaasartuutikinnerulernissaat. Akikilliliineq una september 2014-ip kingorna, nunarsuarmi ikummatissap akiata appariartuler-neraniit, akinik appaanerit arfinilissaraat. Ikummatissap akia 2014-imi aasaaneranit taamaalilluni literimut 1,55 kr.-nik akikinnerulerpoq, nukissiornermut pisortaq Ghita Brask Olsen ilisimatitsivoq.
Pissutaasoq
Akinik appaanermut pissutaanerpaapput 2018-imi ikummatissarsiniarnissami akit qulakkeerneqarsimasut appasinnerunerat amerikamiullu aningaasaata nalinganik qulakkeerinnissutit akikinnerunerat.
