Aleqa kamappoq: Danmarkip qinersinissaq sunniuteqarfigaa
Nunatsinni Camp Century pillugu isumasioqatigiinnerup kinguartinneqarnera, Folketingimut ilaasortap Aleqa Hammondip (attaviitsoq) kamaatigaa.
- Soorlu danskit naalakkersuisuisa Inatsisartunut qinersinissaq sunniuteqarfiginiarsarigaat. Tassami uanga isinnik danskit naalakkersuisuisa oqallinneq unitsinniarsaraat.
Isumasioqatigiinneq taamaatinneqartoq
Statsministerip Lars Løkke Rasmussenip, Folketingimi Nunarput pillugu ataatsimiititaliap nunanut allanut ministeri Anders Samuelsen peqatigalugu ammasumik isumasioqatigiinnissaq taamaatereeraalu, Folketingimut ilaasortaq Aleqa Hammond, attaviitsoq, Sermitsiaq.AG-mut taama oqarpoq.
- Qineqqusaarnerup nalaani Camp Century oqallisigineqassappat, Danmark saqqummiunneqarsinnaavoq. Kisianni saqqummiunneqarusunngillat, taamaattumi isumasioqatigiinneq kinguartinneqarpoq, tamannalu isumakkeerfigineqarsinnaanngilaq. Isumasioqatigiinneq aqagu pisariaqaraluartoq isumaqarluinnarpunga, taanna erseqqissaavoq.
Suliaq toqqaannartumik Naalakkersuisunut attuumassuteqartuuppat, kinguartitsineq akuerisimassagaluarlugu, Aleqa Hammondip oqaatigaa.
‘Ajunngitsumik’ saqqummerniarsarisut
- Kisianni Naalakkersuisut suliami toqqaannartumik attuumassuteqanngillat, tassami Danmarkip Camp Century akisussaaffigaa. Danskit kisimik suliassaqarfigaat. Isumasioqatigiinnermi apeqqutinik isornartorsiuisunik apeqquteqarniaraluarpunga, taamaattumi danskit naalakkersuisuisa apeqqutit isornartorsiuisut pinaveersaarpaat. Danmark suliami ‘ajunngitsutut’ saqqummerniarsaripput. Taamaattumik Inatsisartunut qinersinermut Danmark sunniuteqarusuttoq nalilerpara, taanna oqarpoq.
- Camp Centuryp saliititsinermut aningaasat atorneqartussat silaannarmit tiguneqarput. Aningaasat taakku qanoq naatsorsorneqarsimanerannik erseqqissumik paasinissaat amigaatigaarput, Aleqa Hammond oqarpoq.