Aningaasanut inatsimmi sinneqartuulaarneq
2018-imut aningaasanut inatsit 11,2 million koruuninik sinneqartoorfiungaluartoq, 2021-llu tugaanut IS-mi inerniliussarineqartuni 0,8 million koruuniinnarnik sinneqartoorfiussaaq.
Tamanna Aqqaluaq B. Egedep ullumi, ukiaanerani ataatsimiinnerup naggaserneqarnerani, pingajussaaneerinninnginnermi akissutaani erserpoq.
Ajornartoornermi ikiorsiissut
Aningaasanut inatsimmi ajornartoornermi ikiorsiissut nutaaq tassaavoq aalisarnermut isumalluutinut atuinermut akitsuut, taanna katillugu 69,4 million koruuninik amerlanerusunik isertitsissutigineqartussatut naatsorsuutigineqarpoq.
Aningaasanut inatsit iluatsittumik oqimaaqatigiissarneqarsimanera, Aqqaluaq B. Egedep nuannaarutigaa, 2017-imullu aningaasanut inatsit ukiuni sisamani atuuffissaani katillugu 145 million koruuninik amigartooruteqarfiulluni akuerineqarsimanera ilanngullugu tikkuarpaa.
- 2018-imi taama oqimaaqatigiissitsineq ilaatigut aningaasat nalingisa ataatsimut isigalugu pitsaasumik nikerarnerannit piviusunngortinneqarsinnaanngorpoq. Aammali pisuussutinik atorluaanermut akitsuutit pillugit inatsisip nutaap aammalu pigisanit pissarsianut akileraarusersuinissamik siunnersuutit akuerineqartut nassatarisaannik aningaasaqarnikkut oqimaaqatigiissaarinissamik naligiinnerulernissamillu naalakkersuisut anguniagaat ikorfartorneqarput, Aningaasaqarnermut Akileraartarnermullu Naalakkersuisoq allappoq.
Naligiinneruneq
2018-imi aningaasanut inatsisissaq aqqutigalugu atugarissaarneq annertuumik pitsanngoriaateqassasoq, tamatumalu peqatigisaanik naligiinnerulersitsisoqassasoq Naalakkersuisut isumaqarput, taanna allappoq.
