Aqqaluaq mittarfissuit pillugit: Naalakkersuisut apeqqutinut akisinnaanerat killeqarpallaarpoq
Aqqaluaq Biilmann Egede, IA sinnerlugu aningaasaqarnermut ataatsimiititaliami ilaasortaq, ataatsimiititaliap apeqqutaasa ilarpassuinut Naalakkersuisut akisinnaannginnerarlugit ilungersuummeqqavoq
Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut inatsisaattut Naalakkersuisut siunnersuutaat 28. majimi Inatsisartut siullermeerlugu suliareriarlugu aningaasaqarnermut ataatsimiititaliamut suliarineqartussanngorlugu ingerlateqqinneqarmalli, assorsuaq ajornarpoq ataatsimiititaliap suliassamik suliarinninnera pillugu malinnaassalluni, ataatsimiititaliamimi ilaasortat tamarmik siulittaasuminnut, Hermann Berthelsen (S)-mut innersuussisaramik, taassumalu sulineq matoqqalluinnartumik ingerlammagu ilisimasavut annikitsuararsuupput.
Aviisi Sermitsiaq allappoq.
Naammaginneqqajanngilaq
Taamaakkaluartorli ataatsimiititaliap sulineranut innuttaasut tamarmik periarfissarissaartutut oqaatigineqarsinnaapput, tassami IA sinnerlugu Inatsisartuni ilaasortap Aqqaluaq Biilmann Egedep § 37 malillugu apeqquterpassui aqqutigalugit malinnaasoqarsinnaagami. Biilmann Egede ataatsimiititaliap akissutisiaanik naammaginneqqajanngilaq, misigisimavorlu aalajangiinissap qalliartornerani avaqqunneqarsinnaanngitsoq ataatsimiititaliap apeqqutaasa saniatigut nammineq aamma apeqqutinik saqqummiussuisariaqarluni.
- Peqqinnanngilaq inuit ikittuinnaat, matut matoqqasut tunuanni oqallitsinneqarmata uffa inuiaqatigiinnut tamanut suliaq pingaaruteqartigisoq, oqallinneq oqaloqatigiinnerlu innuttaasut peqatigalugit ingerlanneqartariaqarpoq, pingaartumik Kangerlussuarmiut Narsarsuarmiullu peqatigalugit. Iluaqutaanavianngilarmi qulequtaannanngorlugu suaarutigineqassappat sumiiffiit taakku marluk namminersortunngorsarneqassasut, taamaammat Naalakkersuisunut apeqquteqarsinnaatitaanera nangittumik atortuassavara, tassami innuttaasunik oqaloqateqarumanngissinnaapput, kisianni siunissami attaveqaqatigiinnerup ilusissaanut tunngatillugu apeqqutigissallugit pingaartitakka pinngitsooratik akisussavaat, Aqqaluaq Aqqaluaq Biilmann Egede (IA) Sermitsiamut oqarpoq.
Allaaserineqartoq aviisimi Sermitsiami, sapaatip akunnerani matumani saqqummersumi, tamakkiisumik atuarneqarsinnaavoq. Aviisi uani pisiariuk:
