Arnap utoqqaap saassunneqarnera paasisaqarfigineqanngitsoq
Arnaq 65-nik ukiulik Narsami kiap saassussimanera, politiit suli ilisimanngilaat
Arfininngornerup unnuaani juulip 7-anni angut arnamik 65-nik ukiulimmik Narsami saassussisoq, politiit suli ujaarivaat.
Sapaatiummat sapaatip-akunnerata siuliani politiit ilisimannittunik ujaasillutik nalunaaruteqarput.
- Marlunnik saaffigineqarput, kisianni suliami paasisaqarnitsinnik kinguneqanngillat, politikommissæri Gideon Quist Sermitsiaq.AG-mut oqarpoq.
- Angutip kinaassusaa suli naluarput.
Arnaq unnuami juulip 6-ata aamma 7-ata akornanni nalunaaqutaq 01.00 missaani angummit ilisimaneqanngitsumit Narsami Louisep Aqqutaani saassunneqarsimalluni, politiinut ilisimatitsisimavoq.
Taassuma tunuatigut angut arpassimavoq, nunamullu uppisillugu aamma aqqusernut sinaanut kalissimallugu. Kingornalu arnap qarlii angutip kivilerpaa, kisianni arnaq ikioqqulluni nillialerpoq.
Angut ilisimaneqanngitsumut sammisumut qimaavoq.
Politiit oqarnerat naapertorlugu, angut qorsuttalimmik qaatigooqarsimavoq.