Assit takukkit: AWG-mut peqataasut puigunaatsumik misigisaqartut
Arctic Winter Gamesip ammaanersiorneqarnera sapaatiummat ingerlanneqarmat nuannaffiuvoq. Sermitsiaq.AG-p kalaallit timersortartut oqaloqatigai
- Isaanerput nuanneqaaq. Timersortarfikkut ingerlaaratta oqaluttuariuminaatsumik misigisimavunga.
Bibi Mikaelsen Qaqortumeersoq, Arctic Winter Gamesip ammaanersiormeqarneranut peqataasoq oqaluttuarpoq.
Taanna sisamassaanik ukiuunerani unammiuaarnernut peqataavoq, Arctic Sportsimik unammisartunut taanna ilaavoq.
- Ammaanersiornerit peqataaffiginikuusakka tamaermik assigiinngillat, misigisaqarfiulluartuaannarlutillu, taanna oqaluttuarpoq.
Misigisaq immikkuullarissoq
Aron Berthelsen aatsaat AWG-mut peqataavoq, taanna aamma Arctic Sportsimi unammissaaq.
- Ammaanersiorneq misigalugu nuanneqaaq. Isaanissarput sioqqullugu pissangalaarpunga, kisianni timersortarfikkut ingerlaaratta ajunngeqaaq. Misigisaq immikkuullarippoq, ilimagissanniillu pitsaaneroqaaq, taanna oqaluttuarpoq.
Futsalimi arsartartoq Rune Broberg Qeqertarsuarmeersoq.
- Peqataalluni misigisaq nuannerpoq, inuppassuaqarpoq. Qanoq innersoq nassuiaruminaalaarpoq, kisianni nuannisaqaagut, 13-nik ukiulik futsalimi arsartartoq oqarpoq.