Peqatigiiffiit umiarsualivitoqqamit kommunip allaffiata saavanut erfalasulerlutik ingerlaaqatigiinnerannik aallartippoq, tassani erinarsoqatigiit tusarnaartitsisuliullugit erfalasoq amuneqarpoq.

Tamatuma kingorna innuttaasut katersortarfimmukarput, tassani kommuni ornigarneqarluartumi ullaakkut kaffisortitsipput.

Tassani kommunalbestyrelsimut ilaasortap Benjamin Kielsenip (S) borgmesterip inuiattut ullorsiornermi oqalugiaataa atuarpaa, tassani ilaatigut ’’Kujataa tamakkerlugu suleqatigiinnikkut ineriartorteqqissagipput’’ oqarpoq, aamma ’’inuiattut kinaassuserput pillugu ataqqinnilluta, inuiaqatigiinnillu tamanut assigiimmik sumi inunngorneq apeqqutaatinnagu pilersitsissasugut.

Taanna naggasiilluni ’’akisussaaqataanermik, ataatsimoornermik ersoqatigiinnermik takutitsissaagut, ataatsimoorneq angusaqartitsisarmat’’.

Tamatuma kingorna naalagiaqatigiittoqarpoq, puiseqqaanniuttoqarluni aamma qaannamik takutitsisoqarpoq, tassani aamma kommunalbestyrelsimut ilaasortaq Benjamin Kielsen takutitsisuuvoq, matumanili nutsugiani ilisarisimaneqartoq qaannamut nassanngilaa.

Puiseqqaanniunnermi Angutitsiaq Isbosethsen ajugaavoq.

Ualikkut pisussat takutitsinerit aliikkusersuinerillu sila pissutigalugu timersortarfimmut nuunneqarput, ikumatitsillunili nerisassiorneq nuunneqanngilaq, qatserisartut imaluunniit timersortarfimmi sulisut isumassarsiatsialaasorinngimmassuk.

Unnuk qittannermik qummoroortarnermillu naammassineqassaaq.