Atornerluinerit nalinginnaaleraangata
Kinguaassiuutitigut atorluisarneq anigorniarlugu suliniummi inoqarfinnut annertuumik suliniartoqassaaq
Inoqarfiit ilaanni meeqqanut atornerluisarnerit nalinginnaasutit isigineqalersarput.
- Atornerluinerit 'sungiunneqassasut' meeqqat ilaatigut oqarfigineqartarsimanerat Meeqqat Illersuisuata MIO peqatigalugu inoqarfinnut angalanermini paasivaa, suliniummi 'Killiliisa'-mi ilaatigut allaaserineqarpoq.
Taamaattumik inoqarfiit annerusumik suliniarfigineqarnissaat pingaartinneqarpoq, soorlu tamanna ippassaq ataasinngornermi saqqummiunneqartoq.
Inoqarfinni assigiinngitsuni suliniutit arlallit taamaattumik aallartinneqassapput.
- Innuttaasut peqatigalugit ineriartortitsisoqarnissaanik anguniagaqartumik kinguaassiuutitigut atornerluisarnerit anigorniarlugit suliniuteqartoqassaaq. Innuttaasut pingaartitaat pisariaqartitaallu tunngavigalugit suliniuteqartoqassaaq, tassani kulturikkut, ataatsimoornikkullu peqataatitsinikkut ingerlanneqassallutik, suliniummi ilanngunneqarpoq.
Kinguaassiuutitigut atornerluinerit nalinginnaasuunngitsut meeqqat atuarfiini aamma sammineqartassapput.
- Kinguaassiuutitigut tunngasunik ilinniartitsikkut atornerluinerit nalinginnaasuunngitsut meeqqat atuarfiini sammineqartassapput. Kinguaassiuutitigut nalinginnaasut kiisalu kinguaassiuutitigut ineriartornerit ilinniartitsinerni sammineqartassapput, suliniummi allaqqavoq.