Ukiormanna avaleraasartoorniarnissamut maanna qinnuteqarfissanngorpoq. Immikkoortumilua ataatsimi piumasaqaatit ukiup siulianut sanilliullugit sukateriffigineqarput.

Ingerlatseqatigiiffiit nammineq angallataateqanngitsunut, ukioq manna pisassiissutinik pissarsissagunik maanna 2017-imi akitsuutinut akiliisimasariaqarput, Aalisarnermut Piniarnermut Naalakkersuisoqarfik Sermitsiaq.AG-mut taama ilisimatitsivoq.

Pisassiissutit tamakkerlutik 66.365 tonsiupput. Taakkunannga kalaallit angallataannut 46.365 tonsit pisassiissutigineqassapput. Taamaattorli taakkunani pisassiissutini angallammik attartornissamut periarfissaqarpoq, pisalli annerpaamik 40 procenterisariaqarpaat.

Ingerlatseqatigiiffimmut angallateqanngitsumut piumasaqaat

20.000 tonsit sinneruttut ingerlatseqatigiiffinnut amerlanerpaamik tallimanut angallataateqanngitsunut assigiimmik agguarneqartarput. Taakkuali piumasaqaatit arlallit naammasseqqaartariaqarpaat, akitsuutinik akiliisimanissaq tassani ilaavoq.

Ingerlatseqaritigiiffiup siorna pisassiissutigineqartoq atorluarsimanngippagu, ilaatigut naliliinermi apparsaataassaaq.

Ingerlatseqatigiiffiit Nunatsinni nalunaarsorneqarsimasariaqarput, Nunatsinni aalisarnermik aamma tunisassiornermik allanik suliaqareersuusariaqarlutik.

Nunanit allaneersunik piginneqataasoqarpat, kalaallit piginnittut amerlanerussuteqarlutik aalajangiisuusariaqarput.
 

Pisassiissutit kingusinnerpaamik marsip 23-anni qinnutigineqartariaqarput.