Skip to main content

Avammut niuernissamik takorluukkat Royal Arctic Linep unitsilerpai

Suliffeqarfik immiaaraliorfik aamma neriniartarfinnik ingerlatsisoq Heca Nuuk annertuumik annaasaqarpoq, Royal Arctic Linep pisussaaffiminik naammassinninnginnera pissutaalluni.

Suliffeqarfiup avammut niuertup Heca Nuup pisortaa, Nicolai Nissen, avammut niuernissamik takorluukkani taamaatiinnarlugit tunniutiinnaqqajaavoq, tamanna nunap iluanaaruteqarfigisussaagaluarpaa.

Nammineertitaasoq
Royal Arctic Linep atuisuni ilisimateqqaarnagit angallassinissat taamaatiinnartarlugit nammineertitaanera tamatuma nassuiaatissartaraa. Tamatuma saniatigut umiarsuaatileqatigiiffik nassiussanik piffissaq eqqorlugu tunniussisarnissani ajornartorsiutigaa.

Juullip immiaarai amerlasuut novembarimi 2017-imi Royal Arctic Linekkut nassiunneqarput. Immiaaraq Islandimi nioqqutigineqarnissaa aamma juullikkunni niuffannermi decembarip aallartinneranut naatsorsuussaagaluarpoq. Umiarsuaatileqatigiiffiup suliai tukangaarmata immiaaqqat Danmarkimut pineqarput, aatsaallu decembari 22-anni Islandimut tikipput.

- Tassani niuernissaq qaangiutereerpoq. Juullimi niuffattut annaavagut, minnerpaamillu millionit sisamararterutaat annaavagut. Tamatuma saniatigut atuisunut immiaaraatitsinnik nioqquteqarusuttunut qilanaarsimasunut tatiginassuserput annaavarput, Nicolai Nissen isumatsattoq nassuiaavoq.

Unammillertoq
Juullip ukiortaallu akornanni Islandimi niuerfimmi pingaarutilimmi avammut nioqquteqarnissamik misileeqqinniarluni aalajangerpoq. Februaarimi aaqqissuussamik annertuumik, politikerinik, aallartitaqarfimmik allanillu peqataaffigineqartumik piareersaateqarpoq, tamanna Kalaallit Nunaata Islandimi ersarinnerulernissaanut peqataasussaavoq.

- Januaarip aallartinnerani immiaaqqanik assigiinngitsunik assartuinissamut Royal Arctic Line isumaqatigiissuteqarfigaarput. Immiaaqqat sapaatip-akunnerata tulliani tikinnissaat pilersaarutaagaluarpoq, Nicolai Nissen ilisimatitsivoq.

Tupaallannartumik nalunaartut
Ippassaq pingasunngornermi tupaallappoq.

Umiarsuaatileqatigiiffiup januaarimi Islandimut angallassinissani taamaatissimagaa pisortap paasivaa. Umiarsuaatileqatigiiffiullu taamaatitsineq pillugu atuisoq paasitissimanngilaa, piareersarnerlu annertooq immiaaqqallu hunnorujulikkaanik tusintinik nalillit annaaneqaqqipput.

- Umiarsuaatileqatigiiffiup taamaatitsineq pillugu paasititsinnginneralluunniit ingasappoq. Taamatut atugaqartilluta avammut niuersinnaanngilagut. Annaasaqarpunga, kisianni aamma tatiginassuseq uppernassuserlu avataani tigusisunnut ajortilluinnarpoq, Nicolai Nissen nassuiaavoq.

Politikkikkut iliuuseqartoqarnissaa neriuutigigaa
Naalakkersuinikkut suliaqartut maanna iliuuseqarlutik inuiaqatigiit aningaasaqarnerannut tunngassuteqarmat, nassiussalerinerup nunatsinni iluarsineqarnissaa neriuutigaa.

Umiarsuaatileqatigiiffik Namminersorlutik Oqartussanit pigineqartoq maanna ukiumi ataatsimi iluamik kiffartuussisinnaasimanngilaq, suliffeqarfimmi it-mut atortut nutaat atulersinneqarneri pissutaallutik, umiarsuillu ilaat ajutoorsimallutik.

Umiarsuaatileqatigiiffiup qullersaasa attaveqaqatigiinnermut naalakkersuisoq, Erik Jensen, atukkat isornartoqartut iluarsiivigineqarnissaannut neriorsuuteqarfiginikuuaat, Erik Jensenip oqarnera naapertorlugu tamanna ukiup naannginnerani pinissaa naatsorsuuteqarluni Sermitsiaq.AG-mut oqarnikuuvoq.

Erik Jensen: Tatiginassuseq pilerseqqinneqassaaq
- Umiarsuaatileqatigiiffiup atuisunut tatiginassutsiminik pilersitseqqinnissaa pingaaruteqarpoq, Erik Jensen oktobarip 23-anni Sermitsiaq.AG-mit apersorneqarnermini naqissusiivoq.

Umiarsuaatileqatigiiffiup pisortaata Verner Hammekenip oqaaseqartinnissaa ajornarsimavoq, sulinerminut atatillugu angalanera pissutaalluni. Umiarsuaatileqatigiiffiup attaveqaqatigiinnermut pisortaa aamma pissarsiassaasimanngilaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER