Iluliarmiu qimussimik sukkanniuuttartorsuaq, Ville Siegstad, 72-inik ukiulik, Avannaata Qimussersuanut qimussit 27-it Ilulissani angunniutilerpata arfininngornermi peqataassaaq.

Avannaata Qimussersuanut Ilulissani marsip 24-ani ingerlanneqartussami iluliarmiut Avannaata Qimussersuanut arfininngornermi kisimik anngunniutissanngillat, tikittut siulliit tallimat annguffigisaannik.

Qasigiannguani peqataasussat aatsaat taama ikitsigisut
Ilulissani qimussit 27-it Avannaata Qimussersuanut anngunniuteqataassallutik nalunaarsimasut, Qasigiannguani angunniunnissamut peqataaniarlutik nalunaarsimasut  aatsaat taama ikitsigaat. Tassani annguniunnissamut qimussit marluinnaat peqataaniarlutik ukioq manna nalunaarsimapput, taamaasillutillu Avannaata Qimussersuaqarnissaanut tamarmik peqataanissartik qulakkeereerlugu.

Qasigiannguani Qimmiutillit Peqatigiiffiani  siulittaasoq, Knud Kristensen, Sermitsiaq.AG-mut oqaluttuarpoq, anngunniunnissamut nalunaarsimasut aatsaat taama ikitsiginerinut qimussertartut inuussutissarsiuuteqarnerminni atugarisimasaannik pissuteqarnerpaasoq:

- Qimmiutillit ukiaq sikkorlunnerata kingunerisaanik atugarissaarpallaarsimanngillat qaleralinnillu tunisisukissimalluni. Taamaammat qimussertartut inuussutissarsiornertik maanna salliutikkallarpaat, Qasigiannguanut takornarianik qimussiussinerit maanna aamma aallartillualermata,  Knud  Kristensen Sermitsiaq.AG-mut oqaluttuarpoq.

Ilimanarmiut anngunniuuteqataassanngillat
Naliginnaasumik Qasigiannguani Avannaata Qimussersuanut anngunniuteqataasut qulit sinneqartaraluarput, Ilimanamiilli aamma anngunniunnissamut peqataaniartunik ukioq manna nalunaartoqarsimanngilaq:

- Qasigiannguani anngunniunnermi Ilimanamiit qimussit pingasut sisamalluunniit peqataasaraluarput, Ilimanamiilli ukioq manna nalunaartoqanngilaq, Knud Kristiansen oqaluttuarpoq, taassumalu ilimanarmiut Qasigiannguani anngunniuteqataaqqinnissaat qularutigaa, Ilimanaq maanna Avannaata Kommuniani nunaqarfiulernikuummat.

Sumiffiinni ukunani arfininngornermi anngunniuttoqassaaq:

• Aasiaat
• Sisimiut
• Qasigiannguit
• Ilulissat
• Saqqaq (Saqqaq/Qeqertaq)
• Niaqornaarsuk (Kangaatsiaq, Niaqornaarsuk aamma Ikerasaarsuk)

Uummannami Avannaata Qimussersuanut anngunniunnissaq sapaatip akunnerata tulliata naanerani ingerlanneqassaaq, Qeqertarsuarmiut Upernavimmiullu Avannaata Qimussersuanut ukioq manna peqataatitaqarnianngitsut.