AWG-imi Nunarput nutaanik arfineq-marlunnik medaaliannatsitaqartoq
Kalaallit timersortartut ippassaq marlunngornermi Arctic Winter Gamesimi arfineq-marlunnik medaaliannapput. Nunat medaaliannattarisimasaat takukkit
Marlunngormat Kalaallit Nunaat Artic Winter Gamesimi ulluni makkuni Canadami ingerlanneqartumi, marlunnik kuultinnappoq.
Ujakkaartartoq Bjarne Hansen ataatsikkut aallarluni 10 kilometerimut unamminermi kuultinnappoq. Kuultinnattup aappaa tassaavoq Ajaana Rosing Kleemann snowboardimik sangusaarnermi ajugaasoq.
Sølvinnattarineqartut pingasuupput. Sisoraaserluni ooqattaasartoq Sondre Slettemark 5 kilometerimut unamminerit tulliulluni apuuppoq. Inuk Brøns snowboardimik sangusaarnermi sølvinnappoq Andreas Johansenilu Arctic Sportimi ‘Two Foot High Kick’-imi aamma sølvinnalluni.
Niels Arkaluk Heilmann aamma Tonny Holm Fisker bronzennapput. Siulleq Dene Gamesimi Snow Snakerluni medaaliannappoq, Tony Holm Fiskerilu Arctic Sportsimi Triple Jumperluni aamma bronzennalluni.
Taamaasilluni Nunarput ukiuunerani unammiuaarnerni maannamut medaaliat 13-it pissarsiarai.
