Biili ujaqqamit nakkartumit eqqorneqartoq
Ukiup affaata ingerlanerani Nuummi qaartitsilluni marloriarluni maanna ajutoortoqarsimalerpoq
Nuummi aqqusinermi 400-rtalimmi qaartitsinermut atatillugu qaarsup ilamerna nakkaammat, biilertoq ataaseq tupatsinneqarpoq. Pineqartup biilia ujaqqamik eqqorneqarpoq, taannali ajoqusinngilaq.
Ajutoorneq nalunaaqutaq 16.30 missaani ippassaq pingasunngornermi pivoq.
Qaartiterinermik suliaqarneq ingerlaannaq unitsinneqarallarpoq, Nuummi politiit pigaartuat ilisimatitsivoq.
Sanaartorfiusumi inuit qaartitsinermik suliaqartut politiit oqaloqatigaat.
Maanna Namminresorlutik Oqartussat qaartitsinermut nakkutilliisui aggersarneqassapput. Taakku maleruagassanik aalangersakkanillu unioqqutitsisoqarsimanersoq misissuissapput, kiisalu sanaartugassanik suliaqartumut akisussaatitsisoqassanersoq.
Qaartiteraluni sulineq qaqugu aallarteqqissanersoq, qaartiterinermut nakkutilliisut aamma aalajangissavaat.
Septembarimi aamma qaartitsinermi ujararujussuarnit Naluttarfik Malik igalaavisigut eqqorneqarpoq.