Demokraatit Naleqqamut: Pilersaarutisi sumiippat?
Demokraatit Atassutillu naminiilivinnissap kingaannerusumik anguniarneqarnissaa kissaatigaat
Partii Naleqqap erseqqissaatigeqqippaa, partiip kissaatigigaa Kalaallit Nunaat ukiut pingasut qaangiuppata Hans Egedep tikinneraniit ukiut 300-t qaangiunnerini Kalaallit Nunaat namminiilivinnissasoq.
Tamannalu Demokraatinik suleqateqarluni anguneqassanngilaq. Partiip qineqqusaartitaa, Niels Thomsen tusagassiuutinut nalunaarummi Partii Naleraq Kalaallit Nunaat 2021-imi namminiilivinnissaanut pilersaaruteqarfigineraa pilllugu apeqquteqarpoq.
- Akileraarut qanoq qaffatsigissava? Tungiuinermi immikkoortut suut sipaarniarfigineqarniarpat?
Peqqinnissaqarfik qanoq sipaarfigitiginiarpisiuk? Inunnik Isumaginninneq sipaarfigineqassava?
Ilinniarnersiutisiat sipaarfigineqassappat? Assartuinermi akit qaffassappat, angallannermi bilittit
akitsortariaqalerlugit?
- Qilanaarpunga taakku apeqqutit akineqarnissaannut, taanna oqarpoq.
- Namminiilivinniaannartoqassanngitsoq
Namminiilivinnissallu sukkasuumik ingerlanneqarnissaa Atassummiit aamma taperserneqanngilaq.
- Aamma oqariartuutigaarput piaartumik namminiilivinniaannarluni oqalunneq piviusorsiunngitsoq politikkeriusimasut aamma tv aqqutigalugu naliliinerat uatsinnut qanittuararsuummat nuannaarutigeqalugu maluginiarsimavara, Atassutip siulittaasua Siverth K. Heilmann AG aviisimit apeqqarissaarfigineqarluni oqarpoq.
Niels Thomsenip partiiani siulittaasup, Randi Vestergaard Evaldsenip tunngaviusumik inatsisissaq pillugu ataatsimiititaliamik atorunnaarsitserusuppoq.
- Uagut aalajangiisinnaagaluarutta pilersinneqanngisaannarsimassagaluarpoq.
- Taamaattumik isumaqarpugut tunngaviusumik inatsisissat pillugit isumalioqatigiissitaq atorunnaarsinneqassasoq taavalu aningaasat politikkikkut nammineq aalajangiisinnaanerup annertusarnissaat atorneqassasut Danmarkimilu oqartussaaffiit mikisut nammineerluta aaqqissinnaasatta ilaat nunatsinnut nuunneqassasut, taanna AG-mut oqarpoq.
Siverth K. Heilmannip Randi Vestergaard Evaldsenillu apeqqarissaarfigitinnerat qineqqusaarnermullu allaaserisat allat AG aviisimi atuarsinnaavatit. Aviisi uani pisiassaavoq:
