- Aningaasaqarnikkut sulisoqarnikkullu alliartorneq aammalu raajanut qaleralinnulli akit qaffasinnerini ileqqaarinnittoqartariaqarluarpoq, aningaasarliulernissamilu ingerlalluarumalluni aningaasaliisoqartariaqarluarluni, Nivi Olsen aningaasanut inatsit sinneqartoorfinngussappat piffissami matumani ingerlatsinermut aningaasartuutikillisaanissaq atorluarneqartariaqarluartoq, isummerluni oqaatigaa.

Raajanut qalerialinnulli akitsuutit

Taassuma tikkuarpaa, pisuussutinik akitsuutinut inatsikkut raajanut qaleralinnulli akitsuutit qaffannerisigut 85,7 million koruunit aaneqarsimasut, akitsuutillu qaffanneqarsimanngitsuuppata aningaasanut inatsit amigartoorfiungaatsiartussaasimangaluartoq.

-  Partiit taakku pingasut politikkiata kingunerissavaa qaqugorsuarmulluunniit aningaasarsiornikkut namminiilivikkunnanngitsugut kiisalu ukiorpassuarni Danmarkimit bloktilskuddit isumalluutigisariaqassagigut.  Tamannarpiaanerluni kissaatigisarsi? Allatorluinnarmi oqaluttaraluarpusi nilliaatigileraangassiuk Kalaallit Nunaat allanngortinneqarsinnaanngitsumik namminiivikkiartorpoq, Nivi Olsen oqarpoq ilassuteqarlunilu:

- Immaqa allanngortittariaqaraluarparsi Kalaallit Nunaat allanngortinneqarsinnaanngitsumik namminiilivikkiartortoq pitsunngussasorlu. 

5 milliardit nanineqarlik

Taanna erseqqissaavoq, partiit naalakkersuisoqataasut pingasut maannamut akisinnaanngilaat qanoq ilillutik ukiumut 5 milliarder koruunit pissarsiariniarneqassanersut, pisariaqarmammi taakku pissarsiarinissaat aningaasarsiornikkut nammineq napatilissagutta.

- Malunnarpoq Naalakkersuisut sapiissuseqarpasinngitsut, piumassuseqarpasinngitsut aamma pikkorissuseqanngitsut inuiaqatigiit aningaasartuutaannik pingaarnersiunissaminnut aamma takorluuisoqarsinnaanngilarluunniit qanoq iliorluni isertitat amerlisarneqarsinnaanersut, Demokraatit oqaaseqartartuat oqarpoq.

Partiip 2018-imut aningaasanut inatsit tapersersinnaasimanngilaat itigartitsissutigineqarnissaalu kissaatigalugu.