Disko Line A/S-ip qularnaveeqqutigaa Kujataani angalasut apuunneqarnissaat ingerlatseqatigiiffimmit ilungersuunneqartoq.

- Una nalornissutaanngitsumik erseqqissaatigissuarput, Disko Line A/S-ip sapinngisani tamaat ilaasut apuuffissaannut tamaviaarluni apuunniarsarimmagit. Narsarsuarmut, Narsarsuarmiit aammalu Kujataani illoqarfinnut angalasut pineqarput, Frederik Sandgreen Disko Linemit tusagassiuutinut nalunaarummi allappoq.

Aqqut alla

Taassuma tikkuarpaa, sapaatip akunnerata siuliani Narsarsuarmukartut Narsarsuarmiillu angalasut Itillikkoortillugit Igalikukkoortillugillu apuunneqarsimasut

- Disko Line-mut taamannak aaqqissuussineq akikinnerpaajunngikaluartoq malugineqarsimavorli ilaasut apuuuffissaminnut apuunneqaramik nuannaarsimanerat. Aammattaarlu sapaatip akunnera kingulleq Nanortaliup eqqaani angalasut kinguaattoornikut apuuffissaannut apuunneqarsimapput, Frederik Sandgreen allappoq.

Immikkut qulimiguuliisoqarnianngitsoq

Sikorsuaqarnera pissutigalugu angallatit angalasinnaasimanngillat. Taamaakkaluartoq Kujataani immikkut qulimiguuliisoqarnissaa aamma iluatsinneqarsimanngilaq.

- Una piffissaq kingulleq qulimiguulinnik angallassineq Nunarput tamakkerlugu killilerujussuuvoq. Air Greenland timmisartortartunik amigaateqarpoq, saniatigullu aamma qulimiguulimmik piumasaqaatit allanngorsimanerat angallassinermut eqquivoq, ilaatigut soorlu timmisartortartut pinngitsoorartik marluusariaqartussaalernikuullutik.

- Maannakkut Disko Linep sulissutigivaa Kujataani qulimiguulimmik saniatigut pissarsinissaq, soorlu AS 350-itut ittunik, taamatuttaarlu ullumimiit timmisartortartunik ajornartorsiorneq aamma pitsanngoriaateqarluni, ingerlatseqatigiiffik allappoq.

Qulimiguulik S-61 Kujataanukartinneqarnissaata periarfissaanera, Frederik Sandgreenip ilumuunnginnerarpaa.

- Eqqaamassuarput S-61 Nunarput tamakkerlugu ujaasinernut annaassiniarnernullu taamaallaat atorneqarmata.