DR: Tv-kanaalit pingasut aamma radio kanaalit pingasut peerneqassapput
Sipaarniarnermut pilersaarut 2021-mi tamakkiisumik atulerneqarpat, DR-imi ukiumut 420 millionit koruuninik sipaaruteqartoqartassaaq. Tamanna atorfinnik 400-nik naleqarpoq.
Kanaalit marluk ataatsimoortinneqassapput, DR 3 aamma DR Ultra taamaallaat nittartakkakkut aallakaatinneqartassallutik. DR-ip sipaaruteqaqquneqarnerata tamakku kingunerissavai.
DR-imi sipaarniarneq annertooq atorfinnik 375-400-nik naleqassaaq. Taakkunannga pisortat atorfii 25-t. DR tusagassiuutinut nalunaarummi taama ilisimatitsivoq.
Sipaarniarnermut pilersaarut 2021-mi tamakkiisumik atulerneqarpat, ukiumut 420 millionit koruunit sipaarutigineqartassapput.
Tusagassiorfinnut isumaqatiginninniarnerup kingulliup sipaaruteqarnissamut pilersaarut kinguneraa, tassani DR missingersuutimini 20 procentit sipaarnissaanut peqquneqarpoq.
DR-ip pisortaanerata Maria Rørbye Rønnip soraarsitsiortornerit amerlassusaat nammineq soraarniuteqartoqarneratigut aamma nuussuinikkut tamaviaarluni killilerniarsariniarpaa.
- DR-imut nutaamut pilersaarut eqqortuugaluartoq, soorunami DR-imi sulisunut toqqissisimanngitsitsivoq, taanna oqarpoq.
2020-mi DR-ip tv-kanaalit DR1, DR2 aamma meeqqanut kanaali DR Ramasjang taamaallaat aallakaatittassavaat. DR K aamma DR2 ataatsimoortinneqassapput, inuiaqatigiit aamma kultuuri ukkatarineqarlutik. DR3 aamma DR Ultra 2020-mit digitalinngortinneqassapput.