Enoksen: Akerliussutsimik takutitsinermi kusanaatsuliorneq akuersaanngilarput
Akerliussutsinermik takutitsinermi Lars Løkke Rasmussenimut Kim Kielsenimullu akerartuinerit Hans Enoksenimit akuersaanngilluinnarneqarput. Akerliussutsimik takutitsineq Partii Naleqqamit aaqqissuussaavoq
Kim Kielsen aamma Niels Thomsen akerliussutsimik takutitsinermi kusanaatsuliornerit ajuusaarutigineqareersut, Hans Enoksen maanna aamma akerliussutsimik takutitsineq oqaaseqarfigaa.
- Akerliussutsimik takutitsinermi kusanaatsuliorneq akuersaanngilarput, Hans Enoksen tusagassiutinut nalunaarummi oqarpoq.
- Akerliussutsimik takutitsinissaq piumasarineqalermat aaqqissuussineq ingerlanneqarpoq, taamaakkaluartoq akerliussutsimik takutitsisuni inuit ataasiakkaat kusanaatsumik oqariartuuteqarnerat ataasiinnarmilluunnit Partii Naleqqamit akuerinngilarput, ilisimatitsivoq.
Taamaattoq oqariartuuteqarpoq:
- Eqqaamaqqussavarput innuttaasut atugarliortut annertusiartortut nunatsinni eqqarsaatigilluinnarlugit danskit naalagaaffiata atsioqatigineqalerneranut akerliunerput tunngaveqarmat, aammalu mittarfissualiornissamut danskit naalagaaffiata aningaasaliinissaanut tunngasumi partiit siuttooqataaffigisimasatta siulittaasui, inatsisartorisattalu ataasinnguamilluunnit isumaqatigiissummut peqataatinneqannginneri.
Naggataatigut partii sinnerlugu oqaaseqarpoq:
- Taamatuttaaq innuttaasut tusaaneqanngitsutut misigisimapput, innuttaasut qulaatiinnarlugit suliaq ingerlanneqarsimasoq akuerineqanngilaq. Aqutsineq taamatut ingerlanneqarsimasoq kusagineqanngeqimmat inuillu akerliussutsimik takutitserusuttut imaaginnalivimmata akerliussutsimik takutitsinissamut aaqqissuussineq ingerlanneqarpoq, taamaakkaluartoq sakkortuumik oqariartuuteqarnerit saqqummersut kusananngilluinnartutut isigalugit Partii Naleqqamit akuersaanngilluinnarpagut, Hans Enoksen oqarpoq.
Partii Naleqqap siulittaasua akerliussutsimik takutitsinermi peqataanngilaq, Inatsisartuni siulittaasuunera pissutaalluni peqataanani. Aningaasaqarnermut naalakkersuisuusimalersoq Pele Broberg akerliussutsimik takutitseqataavoq, Facebookimilu quppernermini kusanaatsuliornerit akuersaarnagit oqariartuuteqarluni.