Enoksen: Siulersuisunut ilaasortat 30-t nungusarneqassapput
Hans Enoksen, Partii Naleqqami siulittaasoq, suliffeqarfinni Namminersorlutik Oqartussani siulersuisunik nungusaasoqarnissaanik piumasaqarpoq.
Partiimi siulittaasup kalaallit nunaqavissut kisimik, ingerlatseqatigiiffinni Namminersorlutik Oqartussanit pigineqartuni siulersuisuniittarnissaat kissaatigaa.
Inuit 30-t taarserneqassapput
Hans Enoksenip suliniutini iluatsissaguniuk, qinersinerminilu pisarialimmik taperserneqassaguni, annerusumik nungusaanermik kinguneqassaaq, maanna siulersuisuni siulittaasut arfineq-marluk aamma ilaasortat 23-it peerneqassallutik.
Suliffeqarfiit uku siulersuisutik annaassavaat:
- Royal Greenland
- Tele Greenland
- NunaOil
- Sikuki Nuuk Harbour
- Greenland Oil Spill Response
- Greenland Holding
- Kalaallit Airports
‘’Kalaallit nunaqavissut’’ kisimik suliffeqarfinni issiasinnaassapput, Hans Enoksen isumaqarpoq.
Kikkut nunaqavissuuppat
Nunaqavissut qanoq nassuiarpigit?
- Kalaaleq. Nunaqavissunik aamma qallunaartaqarpugut, ukiorpassuarni nunatsinni najugaqarsimasunik, Hans Enoksen akivoq.
- Ukiorpassuarni maani najugaqarsimasariaqarput, kisianni ukiut qassiunissaat oqaatigisinnaanngilara, Hans Enoksen akivoq.
Siunnersuut ajorluinnartoq
Siunnersuut akuerineqarpat Nunatsinnut ajorluinnartumik kinguneqassasoq, Namminersorlutik Oqartussat qitiusumik aqutsisoqarfianeersoq tusarfik isumaqarpoq. Taanna Nunatsinni nunaqavissuusoq, Sermitsiaq.AG-mut ima oqarpoq:
- Nunanit tamalaanit aningaasaliisartut suminngaanneerneq piginnaasanit salliutillugu isiginiartaripput paasigunikku, taava ingerlatseqatigiiffinnut koruunimik aningaasaliiunnanngillat.