Naalakkersuisut tulleriiaartut aalisarnermut inatsit nutarterniarlugu neriorsuiuarput – kisianni piviusunngortinneqarnikuunngilaq.

Aalisarnermut piniarnermut naalakkersuisup siulia, Hans Enoksen (PN), Inatsisartuni siunnersuut siullermeerneqarnera angugaluarpaa. 

Kisianni qinersisoqarpoq, siunnersuutillu suliareqqinneqarnissaanut taamaatitsivoq.

Aalisarnermut piniarnermut naalakkersuisoq nutaaq, Erik Jensen (S), maanna aaqqiissuteqartoqarnissaanik neriorsuivoq.

- Aalisarnermut inatsisip allanngorneqarnissaa ukiorpassuarni oqaluuseraarput. Piaarnerpaamik suliarineqarnissaat pingaarnertut anguniagaraara, taanna Sermitsiaq.AG-mut oqarpoq.

Nuna tamakkerlugu isumaqatigiinneq Naalakkersuisut siuliinit siunnersuut ilisimaneqareersutut ilaatigut Sulisitsisunit aamma KNAPK-mit sakkortuumik isornartorsiorneqarpoq.

Erik Jensenip siammasissumik aaqqiissuteqartoqarnissaa anguniarpaa.

- Nuna tamakkerlugu aalisarnermut inatsisip isumaqatigiissutigineqarnissaa anguniagaavoq, kisianni aalisarnermi pisassat amerlanerusunut agguaanneqartalernissaannik anguniagaq aalajangiusimavarput.

Qinersisoqarnerani siuliani siunnersuut ileqqoq malillugu atorunnaarpoq. Naalakkersuisut nutaarluinnarmik siunnersuuteqarnissaannik tamanna isumaqarpoq. Kisianni siunnersuut nutaajugaluartoq, naalakkersuisoqatigiinnissamut isumaqatigiissummi siunnersuummi pingaarnerit atatiinnarneqarnissaat naqissuserneqarpoq.

- Inatsisissatut siunnersuut nutaajussaaq, kisianni ukiaanerani 2017-imi siunnersuut saqqummiunneqartoq aallaaviussaaq. Kisianni teknikkikkut iluarsiinerpassuussapput, isornartorsiutigineqarsimasut ilaat akueriniarlugit. Maannakkorpiaq allannguutit suunissaat oqaatigisinnaanngilara, Erik Jensen oqarpoq.

Illuatunginik oqaloqateqarnerit Pisassiissutit atorunnaarsinneqarnissaannut killigititat ilaatigut ingammik Sulisitsisunit isornartorsiorneqarput, kisianni KNAPK-mit. Taamaattumik aaqqiissutisat ilaat tassaniinnissinnaapput.

- Aalisarnermi illuatungeriit aallarniutaasumik oqaloqatigalugit aallartereerpugut, soorlu KNAPK, Sulisitsisut, SQAPK, umiarsuaatileqatigiiffiit angisuut aamma SIK-mik ataatsimeersuaqateqartoqassaaq.

Erik Jensenip nuna tamakkerlugu isumaqatigiissuteqartoqarnissaanik oqalunnermini, aalisarnermi illuatungit kisiisa eqqarsaatiginngilai.

- Aammattaaq Inatsisartuni illuatungiliuttunik isumaqatiginninniaqateqassaanga, inatsit sapinngisaq tamaat siammasissumik tunuliaquteqartinniarsaralugu.

Tassanilu Erik Jensenip angusaqarnissamut pisinnaasani tamaasa pisariaqartissavai. Kingullermik Aqqaluaq B. Egede IA-meersoq §37 naapertorlugu siunnersuutissap imassai pillugit apeqquterpassuarnik nassiussaqarpoq.

Kisianni Erik Jensenip maanna imassaa pillugu oqaaseqarnianngikkallarpoq. Tulleriiaarineq eqqortumik pisariaqartoq, taanna isumaqarpoq.

- Pilersaaruteqarpunga, kisianni maannakkut piffissamut pilersaarutiga qanoq isikkoqarnersoq oqaatigeqqissaarnianngiara, Naalakkersuisuni suli oqaloqatigiissutigineqanngimmat.