- Kuultinnalluni misigisaq nuannersorujussuuvoq!

Futsalertartoq Niklas Thustrup Johansen, ilinilu Arctic Winter Gamesimi juniorit finalerneranni ajugaasoq taama oqarpoq. Taakku Alaska 8-2-mik ajugaaffigaat.

- Sapinngisarput tamaat atorlugu unammivugut. Pitsassuarnik ileqarpunga. Målernerput siulleq pingaartorujussuuvoq, arsarnerput ingerlatiinnarparput. Kigaallinnginnissarput ukkapparput, unammisagut saassussiinnalinnginniassammata. Unammineq tamaat sukkasuumik arsarpugut, taamaammallu finalimi ajugaavugut, siulersorti nuannaartoq taama oqarpoq.

Juniorit sungiusaasuata Ole Martinsenip arsartuni tulluusimaarutigai.

- Siullermik Nunatsinni timersoqatigiiffiit qujaffigerusuppakka. Arsartartut ineriartortittorujussuuaat, unammisartullu pitsaanerpaaffimminiittut Arctic Winter Gamesimut aallartissimallugit. Finalimi unammineq aqunniarparput, unammisagullu ammaqattaarniarlugit pilersaarutigalugu, tamanna iluatsilluarpoq, taanna unamminerup kingorna oqarpoq.

Taassuma oqarnera naapertorlugu, unammisartut siunissagissaarput.

- Timersuummut pimoorussisorujussuupput. Unammiuaarnermilu arlalinnik unammilligassaqarpugut, kisianni immitsinnu kivittuaannarluta. Arsartartut artorsarlutik akiuussinnaasut oqiliallannarput. Neriuppunga arsartut ineriartuinnarumaartut. Siunissagissaartorujussuupput, Ole Martinsen oqarpoq.