IA-p siulittaasua: Aaja Inatsisartuni suleqqikkusuppoq
Marlunnik qinigaaffeqartarneq Inuit Ataqatigiinnit aalajangiuffigineqarnikuunngilaq. Taamaammat Aaja Chemnitz Larsenip Folketingimi ilaasortaangaluarluni, Inatsisartuni suleqqilerniarnera, partiip siulittaasuata Sara Olsvigip ajornartorsiutiginngilaa
- Inuit Ataqatigiit ataatsimeersuarneranni marlunnik qinigaaffeqarneq pillugu aalajangiussaqarnikuunngillat, apeqqut aamma ataatsimeersuarnermi kingullermi oqaluuserineqanngilaq.
Inuit Ataqatigiit siulittaasuat Sara Olsvig marlunnik qinigaaffeqartarneq pillugu apeqqummut oqaaseqarpoq.
Sisamanngormat Kommune Qeqertalimmi borgmesterinngortussaq Inatsisartuni ilaasortaajunnaarniarluni nalunaaruteqarpoq, folketingimilu ilaasortap Aaja Chemnitz Larsenip Inatsisartuni issiavinik taarserpaa.
Taamaasilluni Aaja Chemnitz Larsen Inatsisartut ukiakkut ataatsimiinnerat aqagu tallimanngornermi aammaanersiornerani, Inatsisartuni sulinngiffeqarnini atorunnaarsissavaa.
Atuaruk: Aaja Chemnitz Larsen Inatsisartunut ilannguppoq
Aajap nammineq aalajangingaa
Sara Olsvigip oqaatigaa, Aaja Chemnitz Larsen nammineerluni Inatsisartunut ilaasortaaleqqinnissaminik qinnuteqarsimasoq.
- Aaja Chemnitz Larsenip Inatsisartuni suleqataaqqilernera Ane Hansenip tunuarneranut attuumassuteqanngilaq. Sulinngiffeqarnerminik atorunnaarsitsinini nammineq aalajangerpaa, Sara Olsvig oqarpoq.
Upernaaq kommuninut qinersinerup nalaani Sara Olsvigip partiiata borgmesterinngortussat marlunnik qinigaaffeqassanngitsut nalunaarutigaa.
- Taama isummersimanerput attatiinnarparput, Aaja Chemnitz Larsenillu Inatsisartuni suleqatiginissaanut qilanaarpugut, Sara Olsvig oqarpoq.