Nuummi, Ilulissani Qaqortumilu mittarfiliortitsisoqannginnerani massakkut angallannermut pissutsit kiffartuussinissamik isumaqatigiissutit ataanniittut pitsanngorsaqqaarneqartariaqarput. Taama isumaqarpoq Inuusuttut Ataqatigiinninngaanneersoq Nukannguaq B. Jensen.

Lottokuponi

- Angalaneq Nanortalimmiit Nuummut 20.-25.000 koruunilik lotto-mut eqquiniaqataasutut
isigineqariartuinnarpoq, piffissarmi eqqorlugu apuussinnaanissaq tatigisinnaagu –
kingusinaassagaaannilu annaasat utertinneqarsinnaanngitsut – tamanna inuiaqatigiinnut massakkut
atugassaarititaasut Naalakkersuisut isiginngitsuusaaginnarniarnerpaat?, siulittaasup tullia tusagassiuutinut nalunaarummi aperivoq.

Taassuma kaammattuutigaa, Disko Line Air Greenlandillu angalasut sivikinnerusumik angalanissaat anguniarlugu ataqatigiinnerusumik angallassilernissamik
pilersaarusiortariaqartut.  
Nunatsinni imaatigut angallanneq aaqqitassarpassualik suliareqqaarnissaa pingaaruteqartutut
Inuusuttut Ataqatigiinniik isigaat.

Ataqatigiinnginneq

- Isumaqarpugut angallannikkut ataqatigiinngilluinnartumik suliaqartoqarsimanera
suliaqartoqarneralu aaqqinneqapallattariaqartoq. Saniatigut sumiifinni assigiingitsuni
mittarfiliortitsinissat pillugit sumiifinni taaneqartuni Qaqortoq, Ilulissat, Nuuk isumaqarpugut
qulaajarluaqqissaakkamik ingerlasariaqartut, siulittaasup tullia oqarpoq nangillunilu:

- Angallannermut naalakkersuisoq Simon Simonsen qineqqusaarnermi ilaani eqqaavai tuaviortumik
sumiifinni aaliangersimasuni mittarfittaapallattoqassasoq. Tuaviupilunnerup kingunerisinnaasai
Inuusuttut Ataqatigiinniit inuiaqatigiinnut akisoorujussuanngorsinnaanissai ernummatigaavut.