Iligiit pingasut uku pissartanngorniutissapput
Tallimanngorpat angutit futsalimik Nunatsinni pissartanngorniutivinnerat Ilulissani aallartissaaq. KNR-ip timersornermik aallakaatitsisartua Finn Nielsen iligiit sorliit pissartanngorniutissanersut eqqoriarpai.
- Kingullermik pissartanngortut Nagdlunguak’, B-67 aamma IT-79 pikkorissuupput, taakkualu arlaat pissartanngornissaat ilimagaara.
KNR-ip timersorneq pillugu naliliisartua, Finn Nielsen, Sermitsiaq.AG-mut taama oqarpoq. Angutit futsalimik Nunatsinni pissartanngorniutivinnerat aqagu tallimanngornermi Ilulissani aallartinneqassaaq.
Misilittakkat aalajangiissasut
Finn Nielsen oqarpoq, peqatigiiffiit taakku pingasut pissartanngorniutivinnerni ingerlalluarneq misilittagaqarfigilluaraat.
- Nagdlunguak’ nammineq unammisarfimminni unammisussaagamik illersorteqarluartussaassaapput, ukiorlu kingulleq futsalimi GM ingerlanneqarnerani arsarluaqalutik kuultinnapput.
- Peqatigiiffiit Nuumminngaanneersut B-67 aamma IT-79 unamminerit taama ittut misilittagaqarfigilluarpaat, taakkuali najukkaminni futsalimik ligamik ingerlatsisarnertik pissutigalugu ataqatigiilluartuupput. Soorunami pissartanngorniutivinnerni tupaallatsitsisoqarsinnaasarpoq, unammersuarnerli peqatigiiffinnut tamanut pikkunassaaq, taamaammat misilittagaqarneq aalajangiisuussaaq, Finn Nielsen oqaluttuarpoq.
Mumisitsinerit aalajangiisinnaasut
- GM-imi suna aalajangiisussava?
- Unamminerni mumisitsisinnaanerit aalajangiisuussapput, ajornanngitsumimmi isertitsinerit unammineri pingaaruteqarsinnaapput. Iligiit illersuilluarsinnaasut mumisitsinikkullu periarfissarsiorluarsinnaasut GM-imi angusarissaarsinnaapput, taanna oqarpoq.
- GM-imi kina malinnaavigineqassava?
- Ari Hermann B-67-minngaanneersoq. Taanna sukkasuupilussuuvoq arsalerillaqqissupilussuullunilu. Unammisartut unammisarfimmi inissisimalluarsinnaasariaqarput, taassumalu tamanna pikkoriffigaa, taamaammat futsalillaqqissuuvoq, Finn Nielsen akivoq.
Futsalimi GM-imi aaku unammeqattaartussat immikkoortinnerat:
Immikkoortoq 1:
- Nagdlunguak’, Ilulissat
- Sineriak, Nuuk
- Kugsak, Qasigiannguit
- TM-62, Kulusuk
Immikkoortoq 2:
- B-67, Nuuk
- G-44, Qeqertarsuaq
- FC Malamuk, Uummannaq
- NÛK, Nuuk
Immikkoortoq 3:
- IT-79, Nuuk
- Kagssagssuk, Maniitsoq
- Siuteroq, Nanortalik
- UB-83, Upernavik
Puljekampene spilles fredag og lørdag. Kvartfinalerne spilles også på lørdag, mens placeringskampe og finalen spilles på søndag.