Siumup qineqqusaartitaata Ineqi Kielsenip ilinniagaqarsimanngitsut ikiorserusuppai.

Inuttaasummi 60 procentiisa meeqqat atuarfianniit ilinniarfinnut ingerlariaqqissimanngillat. Tamanna Naatsorsueqqissaartarfiup kisitsisaata takutippaa. 20-niit 25-t tikillugit qiviaraanni katillugu 75 procentii ingerlariaqqinneq ajorput. Ajornartorsiullu tamanna Ineqi Kielsenip (S) iliuuseqarfigerusuppaa.

- Tamatumani patsisaasartut amerlaqaat, inuusuttuaqqammi ilinniaqqinnissaminnut piareeqqavissinnaanngillat. Imaassinnaavoq sakkortuumik peroriartorsimasut, atuarfimmi
ingasattajaartumik qinngasaarneqarsimasut imaluunniit allatigut ajornartorsiorsimasut, taamaalillutik atuarfimmi malinnaanissaminnut ajornakusoortitsinnaasarlutik, taanna tusagassiuutinut nalunaarummi allappoq.

Kingusinnerusukkut ilinniarsinnaaneq

Kisitsillu qimerlooraanni inuusuttut 25-niit qummut ukiullit ilinniarsimasut amerlanerupput 29-llu sinnerlugit ukiullit suli amerlanerullutik.

- Qujanartumillu amerlaqaat inersimasunngoriartulerfimmi unittoorfimminnik qaangiisinnaasut.
Pereersimasunut isumakkeerinnillutillu eqqissisarput ilaqutariinnillu pilersitsisarlutik, Ineqi Kielsen allappoq.

Taakkunanngalu amerlanersaat ilinniagaqalerusussinnaanerat ajornartorsiutaavoq. Taakkumi ilaqutaqalersimapput pilersugassaminnik ilinnialeraangamillu pilersuiniarnikkut angummanniapiluulersarlutik. Tamannalu akunnattoorfik Ineqi Kielsenip ilinniartuutigaluni atorfinnik amigaatigineqartunik pilersitsivigerusuppaa.

- Sulisunik ilinniarluarsimasunik pisariaqartitsinerput naapertorlugu sulisitserusuttarpugut taamaammat sulisunik ilinniarsimanngitsunik atorfinitsitsisarpugut, naak atorfinni pineqartuni
ilinniarsimasuusariaqaraluartut. Ilinniarsimanngitsut soorunami nersualaartariaqarpavut imaannaanngitsumimmi suliaqartitaammata, taamaattoq sulisunut allanut unamminarpoq aammalu sulinerup pitsaassusaanut sunniuteqartoorluni. Nunatta ilinniartitaanera Nunatsinnut naleqqussassallugu patsisissaqarluarpugut, taanna oqarpoq.

Inunnit ataasiakkaanit inuiaqatigiinnillu iluaqutigineqassasoq

Ineqi Kielsenip eqqarsaatigaa, assersuutigalugu perorsaasutut ilinniartitsisutulluunniit ilinniagaqarsimanatik suliffillit pikkorissartitsisarnikkut ukiualunni ilinniarsimasutut piginnaasaqalissapput.

- Ilinniartitaanikkut atorfiit ilinniagassatigut isumaginninnikkullu inummut kivitsingaatsiarsinnaapput kiisalu sulisussamik eqqortumik nassaarfiusarluni. Sulisup piginnaasaanik kivitsiffiussaaq, taamaalillunilu innuttaasunut sullissinitsinni pitsaassuseq
qaffatsissinnaallutigu. Ungasinnerusoq isigalugu avataaniit tikisitassatsinnik aningaasartuutigisartakkavut millisarsinnaavagut. Atorfeqartullu ilinniarnini naammassippagu, inuunertik naallugu ilinniarsimasutut akissarsiatigullu kivinneqartussanngortarput, Ineqi Kielsen isumaqarpoq.