Ilinniakkamik naammassinnittunut ineqalernissamut ileqqaarinnissuteqalernissaa Demokraatinit Malene Vahl Rasmussenimit naalakkersuisumut Pele Brobergimut apeqquteqaateqarpoq.

Danmarkimi ilinniagaqarsimallutik Kalaallit Nunaannut angerlartalernissaat siunnersuummi qitiutinneqarpoq. Angerlartalernissaat qulakkeerniarlugu ineqarnermut ileqqaarinnissummik pilersitsisoqarnissaa siunnersuutaavoq.

Ineqarnermut ileqqaartalernissaq qanoq akeqassanersoq Malene Vahl Rasmussenimit apeqqutigineqarpoq. Qaammammut 850-eqarnissaat tassani siunnersuutigaa.

Piviusunngortinneqassapput ukiumut 34 million koruuninik naleqassasoq aningaasaqarnermut naalakkersuisoqarfiup naatsorsorsimavaa. 

Maanna ilinniagaqartut tunngavigalugit naatsorsuineq ingerlanneqarpoq, tassani qaammatit 40.332-it tunngavigineqarput, 2017-milu ilinniakkamik naammassinnittut 673-it aamma nalilersuinermi tunngavigineqarlutik.

- Siunnersuut qanoq akeqassava taggikkutsigu Ilinniarnersiutinik pisinnaatitaasut tamarmik ilinniakkaminnik naammassinnittartut?, Demokraatit tunuliaqutaralugit Inatsisartuni ilaasortanngoqqammersoq aperaaq.

- Kisitsisit taaneqartut toqqammavigalugit 100%-imillu ilinniakkanik naammassinninneq toqqammavigissagaanni ineqarnermut ileqqaartalernissaq qaammammut 850 kr.-iuppat ukiumut 136.756.500 kr.-iussaaq, Pele Broberg apeqqutigineqartoq akivaa.

Akileraartarnermut tunngasunik apeqqut toqqaannartumik akineqanngilaq.

- Naatsorsuineq taaneqartoq § 37-i najoqqutaralugu apeqquteqarnerup avataaniippoq, pissutsinut piviusuusut attuumassuteqanngimmat. Tapiliullugu missingersuusiorneqartariaqassagaluarput assigiissarneqanngitsut soorlu matumani ilanngullugit akissarsiat ineriartorneri, siunissami naammassinnittartut procent-inngorlugit naatsorsuutigineqarneri, akileraarutit annertussusilerneqarnissai, soraarnerussutisiaqalersussat ukiui il.il, Pele Broberg allappoq.