Kinamiut præsidentiata, Xi Jinpingip, sapaatiummat Kinap inatsisartuinit inuunermi sinnerani naalakkersuisussanngortinneqarnini sioqqullugu, unammillertini tamaasa peereerpai.

- Pissaanermik tigusilluarsimasoq oqaatigisinnaavarput. Peqquserlunnginnissamut isumaqatissarsiornermigut partiip iluani unammillertigisinnaasani ukiuni kingullerni piiarpai, Kina pillugu ilisimasalik Andreas Bøje Forsby, Nordisk Institut for Asienstudierimi  Københavns Universitetimi ilisimatooq oqarpoq:

- Kinamiut oqaluttuarisaaneranni nutaajunerusumi siullermeerluni Politiit allattoqarfiata ataatsimiititaliaani pissaaneqarnerpaasumi  ilaasortamut peqquserluttutut unnerluussisoqarpoq.

Allannguineq tikillugu præsidenti ukiuni tallimakkaani marluni naalakkersuisuusinnaatitaavoq. Siuttut siuliit marluk ataatsimoorussamik aqutseriaaseqarsimapput, Andreas Bøje Forsby nassuiaavoq.

- Piffissami Maoip naalakkersuisuuffianit aatsaat siullermeerluni Xi aqutsisutut angisuutut oqaatigineqarpoq, Kina pillugu ilisimasalik oqarpoq.

Præsidenti Xi Jinping 2012-imili pissaanermik tigusivoq. Taamaattumillu 2023-imi pissaaneq ingerlateqqittussaagaluarpaa, kisianni maanna præsidenti 64-nik ukiulik inuunermi sinnerani naalakkesuisuusinnaanngorpoq.

Inatsisartut 3000-it tunngaviusumik inatsimmik allannguinissaminut taasisunit, innuttaasut akornanni tapersersuineq taama annertutiginngilaq.

- Kinami inuit attaveqaqatigiittarfii naapertorlugit naliliissagaanni isornartorsiuisoqangaatsiarpoq, kisianni nakkutilliineq pissutigalugu isornartorsiornerit ingerlaannaq peerneqartarput.

- Kisianni aamma tunngaviusumik allanngorartuunnginnissamik kissaatiginnittoqarpoq, Xi Jinpingip aningaasaqarneq taamatut siuariartortiinnaaguniuk qanorsuaq iliorsinnaavoq, Andreas Bøje Forsby oqarpoq.