Ilulissat kalaallinik aamma nunanit tamalaanit aaqqissuussinernik ataatsimiinnernillu ussagarneqarluartartoq, 2019-imi immaqa arsarnernik takornariartarfittaassaaq.

Avannaata Kommuniata borgmesteria, Siumumeersoq Palle Jeremiassenip isumasioqatigiinnerup ammaanersiorneqarnerani oqalugiarnerani tamanna aqqummiunneqarpoq, tamanna Qeqertarsuup Tunuani innuttaasut aamma ilisimatuut akornanni suleqatigiinnermut nutaamut ammaassisussaavoq, tassani Danmarks Teknologiske Universitet (DTU) Avannaata Kommunia peqatigalugu Ilulissani arsarnernik takornariartarfimmik sanaartornissaa saqqummiunneqarpoq.

Aamma atuaruk: Palle  Jeremiassen: Takornariarpassuarnut qujaannarpugut

Sanaartornerup annerpaartaanut DTU akisussaasuussasoq

Avannaata Kommunia inuussutissarsiornermut pisortaata Hans Peter Lennertip oqarnera naapertorlugu, Qaasuitsup Kommunerisimasaata suliniutigisimasaa tassani pineqarpoq, taanna maanna Avannaata Kommuniata tapersorsorpaa, taanna illu arsarnernik ilisimatusarnermut aamma saniatigut takornarissanut ornigarneqartartutut atorneqartussaammat.

- Arsarnernik takornariartarfiup sananeqarnissaanut Danmarks Tekniske Universitet soqutiginnittuuvoq, taamaattumillu illup sanaartorneqarnerata annerpaartaanut universiteti akiliissaaqm kisianni kommuni aamma suliniummut tapeeqataassaaqm Hans Peter Lennert oqarpoq.

Illu qanoq angitigissanersoq, imaluunniit qanoq akeqassanersoq, Avannaata Kommuniata maannamut oqaaseqarfigisinnaanngilaa.