Ilulissat: Manniit killilersugaajunnaarput
Royal Arctic Linep umiarsuaataa Irena Arcticap Ilulissat januaarimili tikinneqarsimanngitsoq nioqqutissanik nutaanik usilluni tallimanngornermi tikippaa. Pisiniarfiit poorskip tungaanut manninnik killilersuillutik tuniniaasariaqartarsimapput.
Ilulissat sikuunera pissutigalugu januaarip qaammataaniilli umiarsuarmik pajuttumik tikinneqarsimanngitsoq, kiisami tallimanngormat nioqqutinik nutaanik pajunneqarpoq.
Royal Arctic Linep umiarsuaataa Irena Arctica, nioqqutinik nutaanik pajulluni tallimanngormat Ilulissanut tikimmat.
Pisisartut poorskip tungaanut, illoqarfiup pisiniarfiinit Pisiffimmit aamma Ilulissat Center Markedimit manninnik Islandimiit timmisartukkut tikiunneqartunik killilersuiffigineqarsimapput.
- Taamaaliorsimanngikkaluarutta neriniartarfiit akunnittarfiillu pisisartut sussaarullugit manniit tamaasa pisiarisimassangaluarpaat, Ilulissat Center Markedimi pisiniarfiup pisortaa Claus Stefan Steffensen oqarpoq.
