Inatsisartunut qinigassanngortittup kajumissaarutaa: Ilinnut pillutit oqaatsinik ilinniarit
Allaanngilaq isumaqartoqartoq danskisut ilinniartoqartassasoq danskit pillugit. Tamanna kukkunerujussuuvoq. Danskisut ilinniassaagut immitsinnut pilluta inuunermi periarfissiimmata, Demokraatit Inatsisartunut qinigassanngortitaat Morten Funch taama isumaqarpoq.
Kalaallit inuusuttut imminut pillutik oqaatsinik ilinniartariaqartut, Demokraatit Inatsisartunut qinigassanngortitaat Morten Funch kajumissaaruteqarpoq.
- Tuluit pillugit tuluttut ilinniassanngilatit. Aamma danskisut ilinniassanngilatit danskit pillugit. Oqaatsit taakku ilinniassavatit ilinniarnissannut aamma suliarerusutannik suliaqalernissannut periarfissarpassuarnik ammaattussaammatsit.
Demokraatinit Inatsisartunut qinigassanngortittoq Morten Funch qineqqusaarummi taama allappoq.
Kalaallit oqaasii Nunatsinni pisortatigoortumik oqaaserineqartut, tamatta isumaqataaffigigipput, Morten Funchip qularutiginngilaa.
- Taamaakkaluartorli oqaatsit pillugit oqallinneq sakkortuseqqippoq inuppassuillu misigissusaat qaffakaatillugit, Morten Funch allappoq, nangillunilu:
- Allaanngilaq isumaqartoqartoq danskisut ilinniartoqartassasoq danskit pillugit. Tamanna kukkunerujussuuvoq. Danskisut ilinniassaagut immitsinnut pilluta inuunermi periarfissiimmata.
Morten Funch: Danskinut iluarinninnginneq politikerinit pilersinneqartoq
Oqaatsit pillugit oqallinnermi misigissutsit qaffakaasartut aallaqqaammut nunatsinni politikerinit pilersinneqarsimasut, Morten Funch isumaqarpoq.
- Misigissutsit aallaqqaammut nunatsinni politikerinit qaffatsinneqartut taakkorpiaammi aqunnikuuaat innuttaasunullu takutillugu qanoq pissusilersortoqassanersoq aamma qanoq isummersortoqassanersoq taagorneqartumut Danmarkitut aamma danskit oqaasiinut, Morten Funch unnerluusserpalaarluni oqarpoq, nangillunilu:
- Ukiut 40-t kingulliit ingerlanerini politikkikkut sapiissuseqartoqarsimasuuppat isumagineqareersimassagaluarpoq kalaallisut, danskisut tuluttullu kikkut tamarmik ilinniartarnissaat.
Morten Funchip oqarnera naapertorlugu, ajoraluartumik kalaallisut oqalussinnaagutta siunissarput qularnaassagipput oqaluttunik tusaqqusaartoqartuarpoq.
- Taamaattumik ukiuni kingullerni 40-nngulersuni kikkunuku salloqittarneqartut?, taanna aperivoq.
- Meeqqanuku inuusuttullu inuunerminni ingerlaqqittussat. Angajoqqaammi politikerillu suliassaraat meeqqanut innuttaasunullu periarfissanik pitsanngorsaanissaq, Morten Funch oqarpoq.
