Ullumi INI A/S ataatsimeersuarpoq.

Ingerlatseqatigiiffiup ukiumut naatsorsuutaasa inernerisa akuersissutigineqarnissaat ullormut oqaluuserisassaniipportaaq. Akileraarutit ilanngaatigereerlugit 3,2 million koruuninik ingerlatseqatigiiffik sinneqartooruteqarpoq. Inernerusut siulersuisuniit
naammagisimaarneqarput. Sinneqartoorutillu 2018-mut nuunneqarput. Ingerlatseqatigiiffik tusagassiuutinut nalunaarummi taama allappoq.

Najugaqarfittut immikkoortortaqarfiit INI-p aningaasaqarneranut
attuumassuteqanngillat, taamaammallu sinneqartoorutinit sunnerneqarnaviaratik.

Namminersorlutik Oqartussat, kisimiillutik piginnittuusut, Mads Barlach Christensen siulersuisuni siulittaasussatut qinerneqaqqinnissaa kiisalu Kristian May aamma Line
Frederiksen siulersuisuni ilaasortaanissaat aaliangerpaat.

Karin Bing Orkland siulersuisuniit tunuarpoq, sulisunilli qinigaallutik siulersuisuni ilaasortaasut Michael R. Petersen aamma ArnâraK Z. Lennert ingerlaqqillutik.

INI A/S-ip periusissatut suliniutai ingerlatseqatigiiffiup allaffissornerata pitsaanerusumik inerneqalersimaneranik ersersitsipput. Inuiaqatigiinnullu iluaqutissanngorlugu suliffeqarfiup pitsaanerunissaa sulissussinerunissaalu pillugit anguniakkat anguniarnissaat ingerlatseqatigiiffiup siunertariinnassavaa.