Inatsisartunut ilaasortamut Malene Vahl Rasmussenimut (D), inissiat attartortakkat pisortanit pigineqartut qanoq amerlatiginerannik apeqquteqartumut paragraf 37-imut akissummi takuneqarsinnaavoq.

Inissianik naleqquttumik akilinnik pilersitsinissaq ajornakusoortoq

- Inissiaqarnerup annersaa pisortanit pigineqarnera isertuussaanngilaq, tamassumalu kingunerigaa ineqarnermut akiliutit annertugisassaanngitsut. Uanga isinnik isigalugu tamassuma pissutigaa, inissiaqarnerup ilumoortup akimittut akillip pilersinnissaa ajornakusoortoq, pissutigalugu inuit amerlanersaannut akilersinnaanerummat pisortat pigisaanni akikitsumik inissiamik attartorneq, taanna tunngavilersuutimini allappoq.

Malene Vahl Rasmussenip oqarnera naapertorlugu, innuttaasut isertitaqarluartut amerlaqisut pisortanit pigineqartunit attartukkanik ineqarnerat tamatuma kinguneraa, taakkulu piginneqatigiilluni imaluunniit nammineq pigisamik inimik pisisinnaalluaraluartut, aningaasaqarnerannulli imminut akilersinnaanngitsoq.

- Utaqqisut amerliartuinnarneri kiisalu akikitsumik pisortanit pigineqartumik inissiamik attartugassamik innuttaasut pisariaqartitsivissut anguneqarsinaannginneri, tamassuma kinguneraa, taanna allappoq.

Inissianik nalunaarsuisarfeqanngitsoq

Kisianni ineqarneq pillugu kisitsisinik tamakkiisunik peqanngilaq, maani nunatsinni inissianik nalunaarsuiffimmik pilersitsisoqarnikuunngimmat.

- Inissiat attartortittakkat 8.648-t aqutaralugit INI A/S ilisimatitsivoq - taakkulu inissiat Namminersorlutik Oqartussanit aamma kommuninit pigineqarput. Kiisalu IlIuut A/S-ip Nuummi inissiat 800-t missaaniittut aqutarai. Assersuutigalugu Kommuneqarfik Sermersuup inissianut paasissutissaataannut paasissutissat pissarsiarisinnaanngilagut​​​​​​, ineqarnermut naalakkersuisoq Simon Simonsen (S) akissuteqarpoq.

Namminersortunngorsaaneq taperseraat

Naalakkersuisut inissiaqarnerup namminersortunngorsarnissaa siunertaralugu, pisortat  inissiaataasa ilaasa namminersortunit tiguneqarnissaat  pilersaarusiorsimaneraat,​​​​ Malene Vahl Rasmussenip aamma paaserusuppaa.

- Innuttaasut attartortuunissamut sanilliullugu inissianik imminnut pilersornissamik kissaateqartut tapersersorneqarnissaat Naalakkersuisut naapertuuttutut isumaqarfigaat. Tassalu teknikkimut atortulersuutit inissiallu pitsaassusia apeqqutaatillugit inissiamik attartukkamik "attartortumiit piginnittumut" aaqqissuussineq malillugu pisisinnaaneq periarfissaareerpoq, ineqarnermut naalakkersuisoq ilisimatitsivoq.

- Inissianut attartortittakkanut nalinginnaasunut utaqqisut allattorsimaffiata naannerulersinneqarsinnaanera tamatumani iluaqutissaavoq. lIuaqutissaq alla tassaavoq, piginnittut inissiamut najukkaminnut aserfallatsaaliorneqarneranullu akisussaaffeqarnerisa annertunerulernissaat.

Attartortut pisortanit pisartagaqartut

Demokraatit inatsisartunut ilaasortaatitaata aamma inissiat attartortakkat pisortanit pigineqartut procentinngorlugu, inunnit pisortanit arlaatigut tapissutisisartunit, soorlu, ilinniarnermusiat, siusinaartumik pensionisiat, utoqqalinersiat imaluunniit assigisaannik inigineqarnersut paaserusuppaa.

INI A/S ilisimatitsivoq, inissiani INI A/S-imit aqunneqartuni attartortut ineqarnermut pisortaniit tapiiffigineqartartut agguagaanerat imatut isikkoqartut:

Naalakkersuisut naggataani oqaaseqaamminni, Namminersorlutik Oqartussat inissiaataasa kommuninut tunniunneqarnissaat naatsorsuutigineqarnera ilisimatitsissutigaat. Inissianut nalunaarsuivissaq qaqugu piariissanersoq, paragraf 37-mi apeqqummut akissummi takuneqarsinnaanngilaq.