Innaarsunni innuttaasut qimagussortinneqarsimasut illuminnut utersinnaanngikkallassapput.

- Iluliaq suli nikippianngilaq, Kalaallit Nunaanni Politiit pigaartuat, Gedion Quist Sermitsiaq.AG-mut oqarpoq.

Upalungaarsimanerullu allannguuteqannginneranik tamanna isumaqarpoq. Inuit 33-t immamut qaninnermi najugaqartut qimagussortinneqarsimasut, suli illuminnut angerlarsinnaanngillat. Qimagussortinneqartut arlaqartut nunaqarfinnut imaluunniit illoqarfinnut qanittuniittunut aallarsimapput.

Innaarsunnit tassungalu umiatsiamik angalasoqarsinnaavoq, Susanne K. Eliassenip, nunaqarfimmi aqutsisuni ilaasortap sapaatip-akunnerata naanerani oqaatigaa. Kisianni soorunami iluliarsuaq nakkutigineqartillugu aatsaat.

Innaallagissiorfik qarsunneqassagaluarpat Nukissiorfiit Qaarsuni aamma Upernavimmi sarfaliuuteqarput.

Issittumi Sakkutooqarfiup umiarsuaq alapernaarsuut Knud Rasmussen sumiiffimmukartippaa. Taamatullu aamma qulimiguulik annaassiniarnermi atorneqartartoq Ilulissanut nuunneqarpoq, taamaalilluni nunaqarfimmut qaninnerussammat.