Innaarsunni meeqqat kommunip sumiginnarpai
Innaarsunni atuarfiup uppernarsarpaa nunaqarfimmi meeraqartoq kaattunik kinguaassiuutitigullu atornerlunneqartartunik. Qaasuitsulli Kommuniata ikiuinikippallaaqaaq, nunaqarfimmi atuarfiup pisortarigallagaa oqarpoq
Innaarsunni, Upernavimmit 45 kilometerit missaannik avannarpasissusilimmiittumi, Fiilimuup Atuarfiani pisortaagallartup Rosa Hansen Kristensenip misigisarsimavaa meeqqat arlallit angerlarsimaffimminni nerisassaqarneq ajortut, taamaattumillu atuarfik iliuuseqartariaqarsimalluni.
Ajornartorsiulli pillugu angajoqqaat pinnatik, meeqqat namminneq saaffiginnittarsimapput.
Nerisassaqanngitsut
– Meeqqat ilaat oqarnikuupput angerlarsimaffimminni nerisassaqannginnamik kaallutik. Tassa meeqqat namminneerlutik taamatut oqariartorput. Oqartussaasutut meeqqat inuunerinnissaat akisussaaffigaarput, taamaattumillu angajoqqaat suleqatiseralugit saaffigisarpavut, ataatsimoorluta ajornartorsiut qaangerniarumallugu, taanna oqarpoq.
Taamaattumik atuarfiup pisortaasa angajoqqaat oqaloqatigisarpaat, ikiorneqarusuppatalu Qaasuitsup Kommuniani isumaginninnermik immikkoortoqarfimmut saaffiginnittarput, ilaqutariit pisariaqartumik ikiorneqaqqullugit.
– Pisimasut taamaattut atuarfiup erloqinartittorujussuuvai, ilaqutariillu ikiorserneqartariaqarput meeqqat angerlarsimaffimminni naammattunik nerisassaqartannginneranni, Rosa Hansen Kristensen oqarpoq.
Kinguaassiuutitigut atornerluineq
Rosa Hansen Kristensenip paasissutissiissutigaa Innaarsunni meeqqat kinguaassiuutitigut atornerlunneqartarnerannik atuarfik qaqutiguinnaq saaffigineqartartoq.
– Angajoqqaat ilaasa nalunngilaat qitornartik kinguaassiuutitigut atornerlunneqarsimasoq. Uagutsinnut saaffiginnittarput, taamaasillunilu ilaqutariit piffissami ajornakusoortumi ikorfartuussivigeqasinnaasarlutigit. Angajoqqaat qitornarmik atuarfimmi qanoq ingerlanerat naluneq ajorpaat, Rosa Hansen Kristensen oqarpoq.
Suleqatigiinneq amigaatilik
Tamatuma kingorna atuarfiup angajoqqaat suleqatigalugit pisimasumut paasissutissat oqartussaasunut ingerlateqqittarpaat, meeraq eqqortumik ikiorneqarniassammat-
Kinguaassiuutinik atornerluinermik tunngasuni Qaasuitsup Kommuniani isumaginninnermik immikkoortoqarfimmik suleqateqarneq kipiluttunarsinnaasarpoq, Rosa Hansen Kristensen nassuerpoq.
Oqaluttuaq tamaat, Qaasuitsullu Kommuniani angisuunik mikisunillu pisut atuakkit. Aviiseeraq sapaatip akunneranut saqqummersartoq Tamanut Avannaani akeqanngitsumik aasinnaavat uani:
