Tele-Postip imaatigut kabelimik siaarsinerani attaveqaatinik sullissiviup decemberimi saqqummiuppai internettimik atuisunut neqeroorutit nutaat sukkassutsit 2, 10 aamma 30 Mbit atorlugit killeqanngitsumik atuisinnaatitsisut taakkulu qaammammut akeqarput 499, 1.099 aamma 1.199 koruunit.

Tunisineq tupaallannartoq

Flatratemik atuisunut nioqqutit illoqarfinni taakkunani pingasuni attaveqaatinik sullissisut takulluartippai.

- Imaatigut kabelimik illoqarfinni attavilersimasatsinni sullissatta affaat ullumikkut atuinermut isumaqatigiissutitik flateratemut allanngotissimavaat, Tele-Postimi pisortaaneq Kristian R. Davidsen Sermitsiaq.AG-mut qulaajaavoq.

Atuisut isumaqatigiissutinik allanngortitsinerisa annertussusaa pisortap neriuutigissalluguluunniit merserisaa qaangerlugu pisimapput.

Oqaatigiuminaappoq

Tamakku sioqqullugit attaveqaatinik sullissisoq annertuumik misissuereerluni akinut assigiinngitsunut pingasunut neqeroorusiussalluni aalajangersimavoq.

- Siumut oqaatigiuminaappoq neqeroorutit nutaat atuisut qanoq qisuariarfigiumaarneraat. Maanna takusinnaalerparput amerlanersaasa akisuneq toqqarsimagaat. Sukkanersaat 30 Mbit toqqarsimavaat illoqarfinni taakkunani annertoorujussuarmik allannguutaasoq tassami siornatigut attaviluttuusimagaluarput, pisortap isertuarani nassuerutigaa.

Nuannaarutigaa 2017-mi 2018-mil aningaasaliiffigineqartussanut pilersaarut katillugit 630 millioner koruuninik akeqartoq atuisunit tikilluaqulluarneqarmat atuinerunermik kinguneqartumik.

Illoqarfinni Nuummiit avannarpasinnerusuni data ingerlaartinneqartoq qaffariarujussuarsimavoq.

Atuinerulerujussuarneq

Datamik atuineq qiviaraanni netfliximilu filminik isiginnaarnermut naatsoraanni angerlarsimafffinni netfliximik filmit 86.500-ut 2017-mi novemberimi isiginnaarneqarsimapput.

Martsip qaammataannaani netfliximi filmmit 425.500-ut isiginnaarneqarsimapput. Qaffariaat 391 procenterujussuuvoq qaammatit sisamat ingerlanerinnaanni pisoq. Gigabytenngoranni novemberimi 86.607-miit ukiormanna martsimi 425.549-mut qaffariarsimavoq.

Telemik sullissinermi suliffeqarfiup nioqqutissaatai akillu pillugit periusissiaa innuttaasut pissusilersuutaannut sunniuteqartorujussuaq Tele-Postimiit kisitsisit takutippaat.

Nuummi allaaneruvoq

Kristian R. Davidsen ilisimatitsivoq Nuummi Qaqortumnilu atuisut flatratemik nioqqutinut nutaanut saatsinniarnerat ajornakusoornerusoq. Nassuiaatissartaa tassaavoq sumiiffinni taakkunani piffissami sivisuumik 10 Mbitimik sukkassusilimmik atuisoqarsinnaasimammat qarasaasiakkut netfliximik isiginnaarnermut atorsinnaalluartumik.

Tuppallersaatigaali neriuutigilluinnaramiuk illoqarfiit pingaarnersaanni innuttaasut piffissap ingerlanerani flatrate toqqartalerumaaraat.

- Nioqqutivut nutaat atorlugit sullissagut imminnut sullinnissamut periarfissaqalersimapput. Tamanna atuisuulluni makunniagassaavoq. Piffissarli apeqqutaaginnarpoq atuisut imminut sullinnermik toqqissisimaffiginnilernissaannut tamannalu anguniakkatta ilagilluinnarpaa, telemi pisortaq erseqqissaavoq.

Imminut sullissinnaaneq

Tele-Postip periusissiaa malillugu imminut sullinnerit ikinnerusut pisariinnerusullu anguniarneqarput taamaasilluni attaveqarnerup ilusaa imaalerniassammat internettimik mobilinillu atuisut pitsaanerpaamik akikinnerpaamillu sullinneqarsinnaalerniassammata.

Taamaattumik anguniarneqarpoq sulisut ukiumiit ukiumut ikiliartuaartinneqassasut maannakkut periusissiaq 2020-ip tungaanut atuuttoq malillugu. Namminerli suliffimmiit tunuartoqartarneratigut sulisut ikiliartornerat pissasoq, pisortaq naqissusiivoq.