Skip to main content

Inuusuttuaraq arsaatillaqqissoq nunani allani unammisartunngornissani takorloorpaa

Arctic Winter Gamesertoqarnerani arsaattartoq Asii Kleist Berthelsen takutitsilluartorujussuuvoq. - Nunani allani siunissami unammisartunngorusuppunga, oqarpoq.

Arctic Winter Gamesimi futsalimi unammersuaartoqarnerani Kalaallit Nunaannit niviarsiaqqat nukarliit takutitsilluarput. Unammersuaarnermi ajorsanngiivipput, isertitsinerillu unammersuaarnermi arlaqarlutik. 

Nivissat ilaat unammisaqattaarnermi pisassaanngivippoq. Tassani pineqarpoq 14-nik ukiulik Asii Kleist Berthelsen. AWG-qarnerani tallimariarluni unammeqataanermini 33-nit ikinnerunngitsunik isertitaqarpoq - takutitsilluartutullu aamma nersorniarneqarluni. Unamminermi aamma ataatsimi unammeqataanngitsoorpoq napparsimanini pissutigalugu.

Nukappiaqqat unammeqatigisarpai
Nuummi nukappiaqqani GSS-imi arsaqataasartoq Sermitsiaq.AG-mit oqaloqatigineqarpoq.

- Ineriartorluarniarlunga nukappiaqqat arsaateqatigisarpakka. Niviarsiaqqat arsaateqatigisarnerannit aamma unammillernartinnerugakku nukappiaqqat arsaateqatigisarpakka, Asii Kleist Berthelsen, Nuummi arnat futsaalimi unammeqattaarneranni aamma peqataasartoq, oqarpoq.

Asii Kleist Berthelsen nalinginnaanngitsuunngitsoq Arctic Winter Gamesimi sungiusaasuata Knud Egede Olsenip oqaatigaa.

- Qanoq arsaatillaqqitsiginersoq nassuiassanerlugu nalunarpoq. Soorlu unammiartortussanik qinersissagaangatta aalajangersoqqissaartarpagut toqqakkat illersuinermi saassussinermilu pikkoriffeqartassasut. Asii taakkunani pikkorilluinnarpoq. Ukioqatiminit nukittuneruvoq isertitseriallaqqittorujussuullunilu. Taamak ukiukitsigisumik taamallu pikkoritsigisumik takunikuunngilanga siornatigut, Knud Egede Olsen oqaluttuarpoq.

Asii Kleist Berthelsenip unammeqatigisartakkani aquttarai oqarpoq. 

- Tanngannarlunnartarpoq taamaattumik arsartuuteqarluni. Sungiusaasuulluni ilaatigut imaannartarpoq uanga sungiusaasutut ingiinnarumaluunniit nukersortariaqarnanga. Kisianni suli inuusuttunnguuvoq, taamaattumik soorunami pisariaqartippaa tapersersorluarneqarnissani sungiusaasumiillu aamma ikiorluarneqarnissaa, oqarpoq.

Ullut tamaasa sungiusartarpoq
Asii Kleist Berthelsenip arsaanneq pimooruttorujussuanngoreerpaa:

- Ullut tamaasa sungiusartarpunga, ilaatigut ullormut marloriaq sungiusartarlunga. Sungiusarnigut tamaasa ilaaffiginiartarpakka, tassani takutitsiniartarlunga kiisalu suli pikkorinnerorusunnerullunga. Aamma assammik arsartarpunga, sapaatip akunnerata tulliani NÛK peqatigalugit GM-eriassaagut. Kisianni arsaanneq nuannarineruara, Asii Kleist Berthelsen oqarpoq.

- Siunissami suna angorusuppiuk?

- Siullermik nunanut allanut unammisartunngorusuppunga. Kisianni nunani allani inuussutissarsiutigalugu arsaattartunngorusuppunga. Danmarkimi immaqa unammisartooqqaarsinnaavunga kisianni Englandimi Amerikkamiluunniit unammisartunngortusuppunga, Asii Kleist Berthelsen akivoq.

Unammisaqattaarnerpassuit tullinnguupput. Assammik arsarnermi GM-ereeruni GSS-ikkut peqatigalugit nukappiaqqani futsalimi GM-eqataassaaq. Arnani aamma GM-eqataarusussimagaluarpoq, apersortittussaaninili pissutigalugu peqataasinnaanani.

Taakku pereerpata aasaru GM-imini aamma arlariinni peqataassaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

MEST LÆSTE

SENESTE NYHEDER