Maannarpiaq Qaqortumi iikkami qalipaanermi titartakkat isumassarsiallu suliarineqaleruttorput. Assiiartaa sapaatit akunnialui qaangiuppata angallatit illoqarfimmut pulammagiaanut inissinneqassapput, umiarsualivimmi illoqarfimmiillu takujuminartorujussuussallutik. Kisiannili sumiiffiup kusassarneqarnissaata saniatigut aamma suliami isumassarsiat allarluinnaat eqqarsaatigineqarput. Kalaallit Nunaanni sanasut amigaatigineqarput.

Matumani suliami sanasutut inuussutissarsiuteqarnermi periarfissat qanoq amerlalluinnartigisut inuusuttut ilaasa isaannik uititsinissaq neriuutiginarsinnaavoq, suliami pisortaq Heidi Zilmer oqarpoq.

Heidi Zilmer, kalaallinik sorlaqarfeqartoq, illunik qalipaasartutut ilinniarsimasuuvoq, pinnersaallunilu qalipaasarneq immikkut ilisimasaqarfigilersimallugu.

Sanasa pilersitsinissamut sammisaqartitsinermik tunngaveqarpoq. Qaqortumi inuusuttut maannarpiaq Bolatta Silis-Høegh, illoqarfimmi inunngorsimasoq periartorsimasorlu illoqarfiup umiarsualiviani iigarsuarmut qalipaanermi suleqatigaat. 

- Illoqarfimmi angerlarsimaffimmi illoqarfiup sunniuteqarfiginiarneqarnerani suleqataalluni ilorrisimaarnartorujussuuvoq. Illoqarfimmi eqqumiitsulinik sunik suliaqartoqarsinnaanersoq akuttunngitsumik eqqarsaatigisarsimavara, kisiannili eqqarsaatima ingerlateqqinnissaanut piffissaqarneq ajorpunga qunusuissuseqarnangalu, taamaattumillu Heidi taamaaliornissaminut isumassarsilluarsimavoq!

- Tamatuma saniatigut inuusuttut isit nutaat atorlugit illoqarfimmi periarfissanik eqqarsaateqarsinnaanerat, kingusinnerusukkullu isumassarsiaminnik titartagaaraannaanngitsumut, ANGISUUMULLI suliaralugu, taamaalillunilu illoqarfimmiunit avataaneersunillu tamanit takuneqarsinnaasunik piviusunngortitsisinnaanerat takullugu pitsaalluinnarpoq, Bolatta Silis-Høegh oqarpoq.

Tapersersoreqarluartoq

Maannarpiaq unammisitsinermik ingerlatsisoqarpoq, tassanilu inuusuttut kalaallit Qaqortumi umiarsualivimmi streetart-imut siunnersuutinik nassiussisinnaapput. Naliliisussat, ilaatigut Bolatta Silis-Høegh-ip, Katja Vahl Air Greenland-imeersup aamma Preben Møller Great Greenland-imeersup ilaaffigisaasa siunnersuutinit tiguneqartunit ajugaasussaq toqqassavaat.

Sammisaqartitsinermi inuusuttut qanoq iliorlutik isumassarsiatik titartaqqissaarneqassanersut, taamaalillutillu kusanarnerusunngortinneqassanersut, aammalu illumut avatangiisinullu naleqquttunngortinneqassanersut ilitsersuunneqassapput. Titartakkat pisariitsunngorlugit assilialiarineqassapput, taakkulu Great Greenlandip illuutaasa iigaanut aappaluttunut angisuunut nuunneqassapput. Augustimi inuusuttut ataatsimoortut ikorfanut qaqioraralutik assitassaat inissiffissaviinut qalipassavaat. Tassani Heidi Zilmer-ip misilittagai atorluarneqassapput. 

- Inuusuttut, inuussutissarsiutinik ingerlataqartut, illoqarfimmi maligassiuisut ilinniarfiillu tapersersuinera tupaallaatigisorujussuuara. Neriuppunga suliami inuusuttut ilinniagassanut pilersitsiviusinnaasunut amerlasuunut, nasartaanngikkaluarluni ilinniarneqarsinnaasunut takunissinnaalersinneqarumaarput, Heidi Zilmer oqarpoq. 

Filmiliorluni suliaq malinnaaffigineqassaaq

Iikkani qalipaanermut peqatigitillugu inuusuttut allat suliamut tamarmiusumut uppernarsaatissanik filmiliornermik sammisaqartinneqassapput. Tassani videoliorneq, allagartalersuineq allanillu paasissutissaliorneq misilissavaat. Filmiliornermik sammisaqarnermut Inuk Jørgensen, Göteborg-imi Nordiska Filmskolan-imi linieforstanderi, aammattaaq Qaqortumi inunngorsimasoq peroriartorsimasorlu aqutsisuussaaq.

Suliaq aningaasaliisussarsiornikkut piviusunngortinneqarpoq. Kommune Kujalleq aningaasaqarnermut tunngaviliinissamik suliaqarpoq, tamatumalu kingorna Oak Foundation Denmark malinnaavoq, suliallu 2018-imi ingerlanneqarnissaa qulakkeerlugu. Tamatuma kingorna Air Greenland suliamut tapersiivoq, kingornagullu Great Greenland aamma Jotun Denmark malinnaapput. Tamatuma peqatigisaanik illoqarfimmi inuussutissarsiutinik ingerlataqartut assigiinngitsunik tapiissuteqarput, taamaalillunilu missingersuutit naammattusaarnissaat ima ajornannginnerulertigaaq, suliassat tulliit isummersorfigineqalereerlutik. Tassanilu sanasut suliassaat amerlanerusut suliarineqarnissaat eqqarsaatigineqarpoq. Ilaatigut Narsarsuarmi oqaluffiup piuleqqaarnerminili napasuliartaata iluarsaanneqarnissaa alloriarfissanut tullernut ilaassaq.

Qaqortumi iikkami qalipagaq arfininngornermi augustip ulluisa 18-anni ilassinninnermi saqqummiunneqassaaq.