Islandimiut arfanniat ingerlatseqatigiiffiata Hvalur hf.-ip juulip arfineq-pingajuanni arferujussuaq tunnulissuarmut assingusoq pisarimmassuk, nunanit tamalaanit maluginiarneqarpoq.

Tikaagulliusaap aamma tunnulissuup kinguaarigaat, maanna DNA-mi misissuinerup takutippaa, Iceland Monitor taama allaaserisaqarpoq.

Arferup pisarineqarnera unioqqutitsinerunngitsoq, tamanna isumaqarpoq. Tunnulissuit ukiuni qulikkaani arlalinni Islandimi eqqissisimatitaanikuupput. 

- Tamanna uagutsinnut tupaallaataanngilaq, Thorsteinn Sigurðsson oqarpoq, taanna Islandimi imaanut tunngasunut ilisimatusarfimmi oqaaseqartartuuvoq.

- Taamaattumik aatsaat siumuisoqanngilaq, kisianni nunatsinni aamma nunani tamalaani oqallittoqarnera pissutigalugu uppernarsarniarlugu misissuinerup tuaviuunneqarnissaa eqqorsorisimavarput.

Kristján Loftsson, Hvalur hf.-imi pisortaq isumaqataavoq.

- Siornatigut oqaatigereernikuuara. Tamanna ersarippoq, qularutiginikuunngilarput. Arfanniartutta tikaagulliusaap aamma tunnulissuup assigiinngissutaat nalunngilaat, taanna oqarpoq.

Hard to Portip Islandimi niuerpalaartumik arfanniarnermik taamaatitsiniarsarisup peqatigiiffiiup arferup assinganik Facebookimut ikkussinerata kingorna pisaqarneq nunanit tamalaanit maluginiarneqarlunilu isornartorsiorneqarpoq, tassani peqatigiiffiup qaqutigoortuunerarlugu akutaanerarpaa, tunnulissuartut isikkoqarnerarlugu.