Uulia arrortinneqaraangat, toqunartunik pilersitsisoqartarpoq. Taakku toqunartut issittup imartaani arrorteqqinneqarsinnaannginnerat, ilisimatusartut maanna ernummatigilerpaat. Ingeniøren taama allaaserisaqarpoq.

Imartani kujasinnerusunit uulia Issittumi kigaannerujussuarmik arrortikkiartorneqartarpoq. Tamannalu ilungersunarluinnarpoq, tassami siornatigut uuliakoornerit takutippaat, uuliap ilaa minnerusoq katersorneqarluni, ikuallanneqarluni imaluunniit kemikaliat atorlugit akiuinikkut peerneqarnera iluatsittartoq.

Bakteerissat issittumi kigaannerulertartut

- Taamaammat uuliamik mingutsitsinerup annersaa pinngortitamut nammineq iluarsaasussamut qimanneqartarpoq. Bakteerissallu tassani pingaarnersaapput, uuliamik nerillutik arrortitsisussat, postdoc Leendert Vergeynst, Aarhus Universitetimi Arktisk Forskningscenterimeersoq Ingeniørenimut oqarpoq.

Issittumi uuliakoornerup kingunerisinnaasaanik taanna misissuileruttorpoq.

Qiianartillugu bakteerissat kigaannerusumik sulisarnerat ajornartorsiutaavoq.

Akuutissat toqunartut arrortinneqarneq ajortut

Qaamaneq aamma arrortitsinermut iluaqutaasarpoq, kisianni Issittumi ajornerulertoqarsinnaavoq. Tassami arrortitsinermi toqunartunik pilersitsisoqartarpoq. Bakterissat maani Nordsøenimiittut akuutissanut toqunartunut sungiussisimasut misissuinerup takutippaa. Kisianni Issittumi taamaanngilaq.

- Mingutsitsinermit toqunartoq Issittumi ‘tikinneqarpianngitsumi’ ajornerulernissaa ernumassutigaarput, taamaalilluni bakteerissat uuliamik arrortitsisinnaassannginnamik, ingammik taakku toqunartunut akuliutsinneqartillutik.

Molekylet taakku immikkuullarissut Issittumi arrortinneqarsinnaanersut arrortinneqarsinnaannginnersulluunniit ilisimasaqarfigilernissaanut suli ilisimatuussutsikkut misissuisoqartariaqartoq, taassuma naqissuserpaa.