Isumasiuineq: Vittus qinigaatitaqassaaq
Partiit annerit marluk naligiipajaassamaarput. Nunatta Qitornai qinigaatitaqassapput. Suleqatigiissitsisut qinigaatitaqassanngillat.
Qinersinerup kingorna Kim Kielsen imaluunniit Sara Olsvig naalakkersuisoqatigiinnik nutaanik pilersitsinissamut pisinnaatitaaffeqassanersoq suli ammalluinnarpoq. Tassami Siumut aamma Inuit Ataqatigiit qineqqusaarnerup aallartilaarfiani naligiissamaarpasittorujussuullutik inissisimapput. HS Analysep innuttaasut isumaannik Sermitsiamut aamma KNR-imut paasiniaassussinerata tamanna takutippaa.
IA anginerulaartoq
IA Siumumit anginerulaartussaassangatinneqarpoq. Partiip 33,7 procentit taasinernit pissarsiarissavai, tamannalu 2014-imi qinersinerup inernerata assigipajaarpaa. Akerlianik Siumut 2 procentinik annaasaqassangatinneqarpoq, taamaalillunilu 32,6 procentit pissarsiarissallugit. Qinigaatitat amerlassusaat naatsorsoraanni, partiit angeqqatigiissangatinneqarput.
Qineqqusaarnerli suli aallartilluanngilaq. Siumumi siornatigut qineqqusaarluartarnertik uppernarsisareerpaat. 2013-imilu Aleqa Hammondip Kuupik Kleist ajorsartippaa, naak qineqqusaarnerup ingerlanerani IA annerpaanngortussaasoq inuit isumaannik misissuinerit takutereeraluaraat. Aleqa Hammondip pisortat aningaasaataannik atornerluinerata kingorna Siumut qineqqusaarnermi 2014-imi pointitigut kinguaqqangaatsiarluni aallartippoq. Taamaakkaluartoq partiip Kim Kielsen siulersortigalugu IA angujartuaarpaa, naggaterpiaanilu angullugu. Sara Olsvig Kim Kielsenimit taaguunneqarnerunera allanngortitsinngilaq.
Partiit nutaat
Partiinit nutaanit marluusunit Nunatta Qitornai 4,6 procentit pissarsiaralugit qularnaatsumik ilaasortanngortitaqassapput, tamatumalu partii ataatsimik qinigaatitaqartissavaa. Tassanilu maluginiagassaavoq, partiip anguniagai suli tusarfigerpiarnikuunnginnatsigit, taamatullu aamma Vittus Qujaukitsup saniatigut allat qinigassanngortittussat nalugatsigit. Qineqqusaarnerup ingerlanerani partii suli tapersersorteqarnerulernissaminut periarfissaqarpoq.
Suleqatigiissitsisut Inatsisartunut qinigaanissaminnut neriuuteqarniarunik, tapersersorneqarnerunissaminnik pisraiaqartitsisorujussuupput. 1,8 procentit pissarsiarinerannit qinigaatitaqarnissamut pisariaqartinneqartumut 2,7 procentinit 2,9 procentimut suli ungasipput. Tassanilu aamma partiimit Michael Rosingip aamma Tillie Martinussenip qinigassanngortinneqarnerisa saniatigut kikkut qinigassanngortinniarnersut naluarput.
Atassut ataqqartoq
Partii Naleraq 2014-imitut taaguunneqarnermisupajaaq inissisimassaaq, taamaalillutillu pingasunik ilaasortaatitaqaannassallutik. Partiit marluk piaartumik namminiilivinnissamik kissaateqartut 15 procentit missaanni taaguunneqassapput.
Demokraatit aamma 2014-mitut assingusumik taaguunneqassapput, sisamanillu ilaasortaatitaqaannassalluni.
Atassutip ukiorpassuarni kinguariartornini nanginniarpasippaa, isumasiuinermilu 4,1 procentiinnaat pissarsiaat, tamannalu 2014-imi qinersinermut sanilliullugu 2,5 procentimik kinguariarneruvoq. Partii siorna kommunimut qinersinermisut tupaallatsitsisinnaanersoq apeqqutaavoq. Tassani partiip qinigassanngortitaasa ilaat amerlasuunik taaguunneqarluarnissaannik iluatsitsivoq. Ingammik Aqqalu Clasen Jeremiassen Avannaata Kommuniani malunnaatilimmik taaguunneqarluarpoq.
Amerlasuut suli aalajanginngitsut
Qinersisartut iluarinninnissaannik partiit ilungersuuteqarnissaat suli akilersinnaalluarpoq. Apersorneqartummi pingajorarterutaasaat nalorninerarput. Taamaalilluni qineqqusaarnerup ingerlanerani kisitsisit nikingaatsiarsinnaapput.
Misissuineq oqarasuaatikkut nalaatsortumik makinneqartut apersuisoqarneratigut ingerlanneqarpoq. Katillugu inuit 709-t misissuinermi peqataapput, taanna ulluni marsip 21-annit 24-annut ingerlanneqarpoq. Tassani nalorninartoqarnera 2,7 procentinut naatsorsorneqarpoq tatiginassutsimillu akuttoqatigiissaarineq 95 procentiulluni. Isumasiuinermi arnat angutillu, najugaqarfiit (illoqarfik/nunaqarfik), najugaqarfiit (nunap immikkoortui) aamma qinersisartut ukiui eqqarsaatigalugit innutaasut katitigaanerannut naapertuuppoq.