Ullumikkut allaaserisaq Camp Eastimeerpoq, Nicola Mündemannimit Tysklandimeersumit allagaavoq:

Pisuussutinik ujaarlerneq...

Ukioq manna aasaanerani tammaarsimaarneq Kalaallit Nunaanni aallartinngilaq, Islandimi aallartippoq. Tassami eqimattat Reykjavikimi sapaammi 8. juuli naapipput, Peqatigiiffik Kalaallit Meerartaanni suliniummik ingerlatsisoq Gunver C. Justesen peqatigalugu. Siullermik pisuussutinik ujaarlerpuguta; siullermik immitsinnut ilinniarlutalu immitsinnut pingaartinnermik ilinniagaqarpugut, taakkulu ‘’pisuussutit’’ tunniussinnaasaat. Tamatuma meeqqat kingorna pilersaarusiorpugut, programimullu ‘’pisuussutinik’’ ilumoortunik ilanngussilluta, taamaalilluta ullut meeqqanut nuannerluinnarlutillu soquginartillugit. Tamatuma kingorna eqimattani agguataarluta Reykjavikimi pisuussutinik ujaarlerpugut, tassani isumassarsiullaqqissuserput aamma suleqatigiissinnaassuserput misilittarneqarluni; assigiinngitsorpassuarnik assiliisussaalluta, soorlu inunnik pyramidiliaq, hiistip pamiua, aamma oqaluffik taxartitsisoq allallu.

Issittumi misigisassarsiornera

Ullut sisamaanni angalaneq aallartippoq; kiisami Kalaallit Nunaannukalerpugut. Air Iceland Connectip isumannaatsumik Nerlerit Inaannut timmisartuuppaatigut.

Assiliisorput aasaanerani Ittoqqortoormiini tammaarsimaarnermi 2015-imi, Nanortalimmi 2016-imi aamma Qaanaami 2017-imi peqataavoq, taamaakkaluartoq Ittoqqortoormiit eqqaani pinngortitamut kusanartumut tupigusuppoq, qaarsut aputillu, imarlu tungujortoq sikorsuaqartoq, sermersuaq aamma kangerluup illuani qaqqat aputillit. Tamanna misigigatsigu tamatta qujamasoqaagut, minnerunngitsumik tikikkatta qilak allaaqilluni seqinnermat.

Najugaqartut heliportiliarlutik tikilluaqquaatigut, tamarmillu inussiarnerlutillu ammallutik naapippaatigut. Najugaqartut najugaqarfissatsinnukaalluta ikiorpaatigut, kommunillu illuni marlunni iluarusunnartuniitippaatigut. Tikinnitta kingorna aamma soqutiginartunik misigisaqarpugut; siulleq soorunami anartarfiit igittakkat. Tamatta soqutiginartipparput, ingammik puussiartaasa taarsernissaat ilinnialeratsigu, pitsaanerpaamik qanoq igittassanerlugit oqaluuseraarput. Tamatuma kingorna iganermut akussat najukkatsinni sungiusimasagut piginagit iganeq ilinniarparput. Assersuutigalugu lasagne immussuartaqanngitsoq. Kisianni illoqarfimmi avinngarusimasuni aalajangersimasut sungiunniarnissaa nuannaraara, maanilu najugaqartut ilinniassallugit. 

Assersuutigalugu piniartut maani najugaqartut ilaatigut puisip aamma nannup neqaanik ussiinissatsinnut periarfisippaatigut, tamannalu eqimattamiittunut amerlanernut misigisaq immikkuullarilluinnarpoq.

Ataatsimut isigalugu pisiniarfimmi nerisassarpassuaqarnera tupaallaatigaarput, naak ukiormanna umiarsuaq siulleq aggustip sisamaanni tikittussaagaluartoq. Pisiniarfiup imaarussimanissaa aarlerisaarutigineqaraluarpoq, kisianni timmisartumik attavik pitsanngorsimavoq, pisariaqartitagullu tamaasa pissarsiaraagut, tamannalu Ittoqqortoormiinut tikinnitsinni aallartilluarneruvoq.  Tamatuma aamma illoqarfimmi aaqqissuussinissatsinnut pitsaasumik periarfissippaatigut; Timersortarfimmi kulturikkut aaqqissuussineq.