Jens-Erik Kirkegaard politikkimiit tunuarpoq
Inatsisartuni qinersinermi aatsitassanut naalakkersuisuusimasoq qinigassanngorteqqissaanngilaq
Ukiut tallimat suleqataareerluni Siumumi politikkeri Jens-Erik Kirkegaard politikkimiit tunuarpoq. Taanna Facebookimini taama allappoq.
- Qujarusuppunga maana aamma. Nuliannut, ilaquttannut tapersersuinikunullu, qinikkatut inuiaqatigiit kiffartuunnissaanut periarfissaqarsimagama.
Ilaquttat suliffeqarnerlu aallukkusukkakkit.
- Inatsisartunut qinigassanngortissanngilaga, taanna allappoq.
Oqallissaarisartoq
Jens-Erik Kirkegaard 2013-imi qinersinissaq sioqqullugu oqallissaarillunilu isornartorsiuisarsimavoq ingammik aatsitassanut tunngassutilinnik. Taassuma ilaatigut aatsitassanikpiiaanermi royaltiesimut apeqqutit tunngasut qaqippai.
Siumumi siulersuisuusimasut Aleqa Hammond siulittaasoralugu, oqallissaarisartup ilippanarluarnera takulertorpaat. Partiimut ilaasortanngortippaat 2013-imilu qineqqusaaqataalluni. Jens-Erik Kirkegaardip royalties pillugit siunnersuutaa, Aleqa Hammondip
IA Kuupik Kleist siuttoralugu naalakkersuisuunerisa nalaanni, sakkungilluarpaa.
Kusanaatsuliornerup kingorna tunuartoq
Qinersinerup kingorna Jens-Erik Kirkegaard inuussutissarsiornermut aatsitassanullu naalakkersuisutut toqqarneqarpoq, atorfillu taanna aqqutigalugu royaltiesimut siunnersuutini piviusunngortissinnaallugit.
Aleqa Hammondilli pisortat aningaasaataannik atornerluisarsimanera 2014-imi upernaakkut saqqummersinneqarmat, Jens-Erik Kirkegaard suleqataajumajunnaarpoq. Taanna Naalakkersuisutut tunuarpoq, Aleqa Hammondillu Naalakkersuisut siulittaasuattut Siumumilu siulittaasutut tunuarnissaa sunneeqataaffigalugu.
Siulittaasutut qinigassanngortittoq
Kingorna siulittaasussarsiornermi Jens-Erik Kirkegaard qinigassanngortippoq, qularutissaanngitsumilli Kim Kielsen ajorsarfigalugu.
Aleqa Hammondimulli akerliusimanera qinersisartunit aamma takutinneqarluni. 2014-imi qinersinermi taanna qinigaanngitsoorpoq. Naalakkersuisulliu nikisinneqarnerisa kingorna sinniisutut ilaasortanngorluni.
Jens-Erik Kirkegaard 2015-imi folketingimut qinersinermi qinigassanngortippoq. Tassani Siumup qinigassanngortitaasa akornanni 1.467-inik qinerneqarluni aappaattut inissippoq, Aleqa Hammond 3.759-inik qinerneqartoq.