Sermitsiaq.AG Iben Rasmussenimut sianermat, kuultinik saffiortoq pilerisoq akivoq.

- Ulapippunga. Tassami kalaallit rubiniannik pinnersaasiorpunga, taanna oqarpoq, illariarlunilu.

Iben Rasmussenip rubininik ujamiliani ineqqammerpaa, iverutit piariingajalerput, inniminnikkallu arlallit sanaartorneqarnissaminnut utaqqipput.

- Kalaallit rubiniannut soqutiginninneq annertuvoq, inuillu takugaangamikkit tipaatsuataartarput, taanna oqarpoq.

Pissarsiariuminaattut

Taanna Greenland Rubyp Facebookimi allagaanik takunnikkami soqutiginnilersimavoq. Tamanna sioqqullugu rubisiortoqarnissaanik pilersaarutit tusarfigilaarnikuusimavai. Suliniut qanoq ingerlanersoq malinnaaffiginiarlugu qupperneq malinnaaffigilerpaa.

- Kalaallit Nunaanni maanna rubinisiortoqalernera soqutiginartorujussuusoq isumaqarpunga. Danmarkimi Kalaallit Nunaannit arlaatigut attuumassuteqartut misigisut amerlagunarpugut, Iben Rasmussen oqarpoq, taassumali nuna suli tikissimanagu imaluunniit arlaatigut nammineq attuumassuteqarfiginagu nassuerutigaa.

-Kalaallit Nunaanni nunap niuerfigilersinnaasaanik nassaartoqarnissaa neriuutigaara, kiisalu atortussiornermik ingerlatsisoqalersinnaasoq. Tamannalu uanga suliaqarfigaara. Taamaammat kalaallit rubiniannik pissarsiniarnissara qularisimanngilara.

Tamannalu ajornaatsuinnaanngitsoq paasinarsivoq. Aappaluttumi rubininik qalluisoqalersimasoq takusinnaaleramiuk tuniniaasartumut ujaqqanik pinnersaasiassanik pisisarfimminut saaffiginnippoq. Kisianni ukiaq nalunaarfigineqarnera pakatsinarpoq – rubinit suli Danmarkimut tikissimanngillat.

Kingorna gemologi (ujaqqanik pinnersaasianik ilisimasalik) taassunga saaffiginnippoq, taakkulu tikilernerarlugit pissarsissussinnaanerarpaa. Kisianni Aalborgimi kuultinik saffiorfimmut pinnginnerminni Tysklandiliaqqaartussaapput. Tassani institut aligut ataasiakkaarlugit sannaat misissortarpaa, DNA-vanik tigusillutik. Taamaalilluni paatsuugassaanngitsumik suminngaanneernera naqissuserneqarsinnaassammat.

- Kalaallit Nunaannit rubinit immikkut soqutigineqarput, taamaammat tassanngaanneernerisa uppernarsarsinnaanissaat pingaaruteqarpoq, Iben Rasmssen oqarpoq.

Tullii inniminnerai

Maannakkullu pinnersaasiat suliaralugit aallartippoq. Rubininik pinnersaasiat inniminnikkatut suliarineqartarput. Tamanna pisisussap rubininik takusineratigut aamma qanoq kissaateqarnerlutik nassuiaanerisigut pisarpoq. Iben Rasmussenip kingorna pinnersaasiamut siunnersuummik titartaasarpoq. 

- Kalaallit rubiniutaat kusarnartorujussuupput. Soorunalimi pitsaassusaat assigiinngillat, kisianni amerlanerit kusarnartorujussuupput. 

Kuultinik saffiortup ujaqqap qalipaataa akimullu ersarissusaa pingaartinnerusarpaa.

Oqaatigineqartutullu pisisartut nuannarisaqaat. Ujaqqata isikkuat aamma suminngaanneernerisa oqaluttuassartaat pineqartarunartoq, Iben Rasmussen isumaqarpoq.

Inniminniisut amerlangaarmata ujaqqanik aappaluttunik inniminneeqqereersimavoq.